Миллий матбуот марказида «Ўзбекчармпойабзали» уюшмаси томонидан амалга оширилаётган ишларга бағишланган матбуот анжумани ўтказилди. Бу ҳақда ЎзА хабар бермоқда.
Жорий йилда тармоқ корхоналарида умумий қиймати 18 миллион доллардан зиёд 9 та инвестиция лойиҳасини амалга ошириш кўзда тутилган. 2016 йилнинг биринчи чорагида саноат маҳсулотлари ишлаб чиқариш ҳажми ўтган йилнинг шу даврига нисбатан 17,1 фоизга ўсган.
Аҳолининг сифатли чарм-пойабзал маҳсулотларига талабидан келиб чиқиб, тармоқ корхоналарида импорт ўрнини босадиган рақобатбардош маҳсулотлар ишлаб чиқарилмоқда. Хусусан, 300 дан ортиқ турдаги пойабзал ҳамда 70 янги турдаги чарм-атторлик маҳсулотлари ишлаб чиқариш йўлга қўйилган. Маҳаллийлаштириш дастури доирасида учта лойиҳанинг амалга оширилиши натижасида импорт ўрнини босадиган уч турдаги маҳсулот ишлаб чиқарилган.
Маҳсулотлар Жанубий Корея, Хитой, Италия, Туркия, Покистон, Ҳиндистон ва бошқа мамлакатларга етказиб берилиши янада кенгайиб, экспорт кўрсаткичлари прогнозга нисбатан 38,3 фоиз юқори бўлган. 2010 йилда уюшма корхоналари томонидан 1 миллион 300 минг долларлик маҳсулотлар экспорт қилинган бўлса, жорий йилда бу кўрсаткични 190 миллион 500 минг долларга етказиш кўзда тутилган.
Вилоят ҳокимликлари билан ҳамкорликда жорий йилда корхоналарга чет эл инвесторларини жалб қилиш, мавжуд ишлаб чиқариш қувватларидан тўлиқ фойдаланиш, янги корхоналарни ташкил этишга қаратилган 264 лойиҳа амалга оширилиб, уч мингдан зиёд янги иш ўрни яратилади.
Изоҳ (0)