Эрон маданият вазири Али Жаннатий 12 май, пайшанба куни эронлик зиёратчилар бу йил Саудия Арабистонига ҳаж сафари уюштира олмаслиги мумкинлигини маълум қилди, деб ёзади «Интерфакс».
Вазирнинг баёноти Теҳрон ва Ар-Риёднинг эронлик зиёратчи шиаларга визалар тақдим этиш ҳақидаги муваффақиятсиз музокараларидан сўнг янгради.
«Биз қўлимиздан келганини қилдик, аммо саудияликлар музокараларга тўсқинлик қилди. Энди вақт йўқотилди», — дея таъкидлади вазир.
Жаннатийнинг сўзларига кўра, аввалроқ Саудия Арабистони ҳукумати Ар-Риёд ва Теҳрон ўртасида дипломатик алоқалар мавжуд бўлмаган бир шароитда эронлик зиёратчилар виза олиш учун қиролликнинг бошқа мамлакатлардаги элчихоналарига мурожаат қилиши кераклигини айтган эди.
Унинг қўшимча қилишича, Саудия Арабистони, шунингдек, Эроннинг эронлик зиёратчиларни ҳаво йўли билан ташишни ташкиллаштириш ва уларнинг хавфсизлигини таъминлаш борасидаги таклифларини рад этган.
Эслатиб ўтамиз, 2 январь куни Саудия Арабистони ташқи ишлар вазирлиги терроризм ва фитна учун судланган 47 кишига нисбатан ўлим ҳукми ижро этилганини эълон қилди. Саудия ҳукумати шиалар хатиби Нимр ан-Нимрни қатл қилгани маълум бўлганидан сўнг, Теҳронда намойишчилар Саудия Арабистони элчихонасига бостириб кирди. Шундан кейин Саудия Арабистони Эрон билан дипломатик алоқалар узилганини эълон қилди.
Изоҳ (0)