Янги Meizu М3 арзон смартфони расман тақдим этилди (фото)

Meizu компанияси янги М3 смартфонини тақдим этди, дея хабар бермоқда «Hi-tech.mail.ru». Гаджет 3 гигабайтгача тезкор хотира, шунингдек, Хитой ўлчовларига кўра ихчам 5 дюймли экранга эга.

Meilan сериясига киритилган смартфон қўш қуйма пластик (рангли қатлам шаффофининг устидан қопланади) корпус ҳамда тобланган 2,5D-шиша билан ҳимояланган 1280×720 пикселли экран билан таъминланди.

М3 саккиз ядроли MediaTek MT6750 чипсети асосига қурилган. Таянч модификацияда 2 Гб, топ модификацияда эса 3 Гб тезкор хотира бўлади, ички хотира ҳажми эса 16 ёки 32 гигабайтни ташкил қилади. Унга 128 гигабайтгача бўлган ҳажмли microSD хотира картасини ўрнатиш мумкин.

Meizu М3 13 мегапикселли асосий ва 5 мегапикселли олд камерага эга. Аккумулятори сиғими 2870 мА/с. Смартфон Android базасидаги Flyme OS қобиғига эга YunOS операцион тизимида ишлайди.

Хитойда янги қурилма 29 апрелданоқ сотувга чиқади. Таянч версияси (2 Гб тезкор ва 16 Гб ички хотира) 599 юань (92 доллар), топ версияси (3 Гб тезкор, 32 Гб ички хотира) эса 799 юан (122 доллар)дан сотилади.