Дональд Трамп агар истаса, сайловларни сотиб олиши мумкинлигини билдирди
Республикачилар партиясидан АҚШ президентлигига номзодликка даъвогар Дональд Трамп мамлакатдаги сайлов тизими «жуда ёмон ва адолатсиз» эканлиги, шу боис, агар истаса, сайловларни сотиб олиши мумкинлигини билдирди. Бу ҳақда у 20 апрель, чоршанба куни Индианаполисда бўлиб ўтган тарафдорлари билан учрашувда маълум қилган, дея хабар беради «ТАСС».
«Ишонинг, сайловларни керак бўлса бир неча марта сотиб олишим мумкин эди. Бу жуда ёмон ва адолатсиз тизим», — дея таъкидлаган Трамп.
Миллиардер президентликка номзодлар илгари суриладиган партия съезди делегатлари қўллашига эришиш учун айрим номзодлар штаблари томонидан уюштириладиган қабулларни мисол келтирди.
«Улар делегатларни самолётга ўтқазиб, курортларга жўнатиши, зиёфатлар уюштириши, меҳмонхоналар буюртма қилиши мумкин. Бу эса уларнинг сайловларни сотиб олишлари мумкинлигидан далолат беради. Мабодо шундай ‘Сайловларни сотиб ол’ ўйини бўлганида, шубҳасиз, унда ғолиб чиққан бўлардим», — дея ишонтирган Трамп.
