Арбитраж суди Федерал антимонополия хизматига қарши берилган даъвони қондиришдан бош тортгач, Google бундан норози бўлиб шикоят аризаси берди, деб ёзади «Ведомости» интернет-компания вакилига таяниб.
«Биз кейинги суд инстанциясига апелляция топширдик. Биз, шунингдек, Россия ҳукумати билан ҳамкорлик қилишда ва Android экотизими қандай ишлашини тушунтиришда давом этмоқдамиз», — деди у.
Америка компанияси 2015 йил декабрида судга мурожаат қилиб, Федерал антимонополия хизматининг қарорини бекор қилишни сўраган эди. Гап шундаки у Google’ни Android операцион тизимида ишлайдиган қурилмалардаги олдиндан ўрнатилган дастурлар бозорида рақобатни бузишда айбдор деб топган эди. Ўтган йил октябрида хизмат қонунбузарликни бартараф этиш — Google Play дастурлар дўконини бошқа сервислардан, жумладан, қидирув тизимидан узиб қўйишни буюрган эди.
Суд Google’нинг Федерал антимонополия хизмати бозорлар ҳажмини ва ўйинчилар улушини нотўғри ҳисоблагани ҳақидаги далилларини қабул қилмади.
Москва арбитраж суди қароридан сўнг Федерал антимонополия хизмати бозордаги устунлигини суиистеъмол қилганлиги учун, Google’га нисбатан маъмурий иш қўзғатди. Компания мобил дастурлар бозорида 2014 йилда олган даромадининг 1 фоиздан 15 фоизигача миқдорида жарима тўлаши мумкин.
Изоҳ (0)