Футбол бўйича ЖЧ—2018 3-саралаш босқичидаги рақибларини билиб олган Ўзбекистон миллий терма жамоаси 7 июнь куни Канадага қарши ўртоқлик ўйинида майдонга тушади. Бу ҳақда ФИФА расмий сайтининг Ўзбекистон футбол федерациясига ажратилган саҳифасида маълумот бор.
Саралашнинг ҳал қилувчи босқичини 1 сентябрь куни Сурияга қарши Тошкентда бошлайдиган Ўзбекистон терма жамоаси Канадага қарши учрашувни Австрияда ўтказади. Ўйин қайси шаҳарда бўлишига ойдинлик киритилмаган.
Канада терма жамоаси 7 апрель куни эълон қилинган ФИФАнинг янги рейтингида 95-ўринни эгаллаб турибди. ЖЧ—2018 саралашининг КОНКАКАФ минтақасида Мексика, Гондурас ва Салвадор билан бир гуруҳдан жой олган Канада, 4 та ўйинда 4 очко жамғаргани ҳолда 3-ўринни эгаллаб турибди.
ЖЧ—2018 саралашининг Осиё минтақасида Ўзбекистонга рақиб бўлган терма жамоалар ҳам бир қатор ўртоқлик ўйинлари борасида келишувга эришган.
Жумладан, Эрон 30 май куни Хорватия билан, 2 июнь куни Македония билан майдонга тушади. Жанубий Корея ва Қатар терма жамоалари ҳам Евро—2016 иштирокчилари билан ўйин ўтказади. Кореяликлар 1 июнь куни Испания билан, 5 июнда эса Чехия билан беллашади. Қатар эса 29 май куни Албания билан ўртоқлик учрашувида иштирок этади.
3-саралаш босқичидаги Ўзбекистон термасининг биринчи рақиби Сурия 31 май куни Вьетнам билан ўйин ўтказади. Фақатгина Хитой терма жамоасининг олдиндаги ўртоқлик ўйинлари режаси кўрсатилмаган.
Изоҳ (0)