ЕЧЛ. Роналду «Реал»ни, де Брюйне «Манчестер Сити»ни ярим финалга олиб чиқди

Футбол бўйича Европа Чемпионлар Лигаси мусобақасида ярим финалнинг иккита иштирокчиси номи аниқ бўлди.

«Реал» ҳамда «Вольфсбург» жуфтлигининг Германияда бўлиб ўтган биринчи ўйинида немис клуби 2:0 ҳисобида муваффақият қозонганди. «Сантьяго Бернабеу»да бўлиб ўтган жавоб ўйинида Криштиану Роналду томонидан қайд этилган хет-трик «Реал»нинг йирик ғалабасини таъминлади.

Шу тариқа Криштиану Роналду Чемпионлар Лигасининг жорий мавсумдаги голлари сонини 10 та ўйинда 16 тага етказиб олди ҳамда «Реал»ни ярим финалга олиб чиқди.

Куннинг иккинчи ўйинида «Манчестер Сити» ҳамда «ПСЖ» клублари «Этиҳад» стадионида тўқнаш келди. Томонларнинг Париждаги ўйинида 2:2 ҳисоби қайд этилган бўлса, бу сафар Кевин де Брюйне томонидан урилган гол «Манчестер Сити»га ғалаба тортиқ қилди.

Париждаги беллашувда Златан Ибраҳимович пенальтидан аниқ фойдалана олмаганди. Бу сафар «Манчестер Сити» клуби ҳужумчиси Серхио Агуэро 11 метрлик жарима зарбасини муваффақиятсиз амалга оширди.

Қайд этиш керак, «Манчестер Сити» ўз тарихида биринчи бор Чемпионлар Лигасининг чорак финалида ўйнади ҳамда ярим финал чиптасига эга чиқди.

Чемпионлар Лигасининг яна икки ярим финалчиси номи эртага бўлиб ўтадиган «Бенфика» — «Бавария» ҳамда «Атлетико» — «Барселона» ўйинларидан кейин маълум бўлади. Биринчи ўйинда «Бавария» 1:0 ҳисобида муваффақият қозонган бўлса, «Барселона» рақибини 2:1 ҳисобида таслим қилган.

Европа Чемпионлар Лигаси Чорак финал беллашувлари 12 апрель, сешанба

«Реал Мадрид» (Испания) — «Вольфсбург» (Германия) 3:0

Голлар: Криштиану Роналду, 16 (1:0). Криштиану Роналду, 17 (2:0). Криштиану Роналду, 77 (3:0).«Реал Мадрид»: Кейлор Навас, Пепе, Серхио Рамос, Криштиану Роналду, Тони Кроос, Карим Бензема (Хесе, 84), Гарет Бэйл, Марсело, Каземиро, Даниель Карвахаль, Лука Модрич (Рафаэль Варан, 90+2).«Вольфсбург»: Диего Бенальо, Виейринья, Юлиан Дракслер (Макс Крузе, 32), Бруно Энрике (Даниэль Калижури, 73), Андре Шюррле, Данте, Луис Густаво, Жошуа Гилявоги (Бас Дост, 80), Налдо, Максимилиан Арнольд, Рикардо Родригес.

«Манчестер Сити» (Англия) — «ПСЖ» (Франция) 1:0

Гол: Кевин де Брюйне, 76 (1:0).Ноаниқ пенальти: Серхио Агуэро, 30 (М).«Манчестер Сити»: Жо Харт, Бакари Санья, Фернандо, Серхио Агуэро (Келечи Иҳеаначо, 90+3), Хесус Навас, Кевин де Брюйне (Яя Туре, 84), Эляким Мангалья, Давид Сильва (Фабиан Делф, 88), Гаэль Клиши, Фернандиньо, Николас Отаменди.«ПСЖ»: Кевин Трапп, Тьяго Силва, Маркиньос, Тьяго Мотта (Лукас, 44), Эдинсон Кавани, Златан Ибраҳимович, Анхель Ди Мария, Максвелл, Серж Орье (Хавьер Пасторе, 61), Грегори ван дер Вил, Адриен Рабьо.