Ўзбекистоннинг Шанхай ҳамкорлик ташкилотида раислиги доирасида жорий йилнинг 13—14 апрель кунлари Тошкентда ШҲТга аъзо давлатлар Хавфсизлик кенгашлари котибларининг учрашуви ўтказилади. Унда трансмиллий таҳдидлар, жумладан, терроризм, экстремизм, гиёҳванд моддалар ташиш, трансчегаравий жиноятчилик билан кураш масалалари муҳокама қилиниши кўзда тутилган, дея хабар беради «Жаҳон».
Хавфсизлик кенгашлари котиблари мажлислари Ўзбекистон ташаббусига кўра ташкил этилган бўлиб, биринчи учрашув 2004 йилда Тошкентда бўлиб ўтганди. Ушбу учрашувлар хавфсизлик борасидаги вазиятни ўрганиш, таҳлил қилиш ва баҳолаш, ШҲТ мамлакатларининг хавфсизлик ва барқарорликка таҳдидларга қарши кураш бўйича саъй-ҳаракатларини мувофиқлаштириш, улар ўртасидаги сиёсий мулоқотни чуқурлаштиришда муҳим аҳамият касб этади. Мазкур мулоқотлар доирасидаги музокаралар анъанавий ва янги таҳдидларга ўз вақтида жавоб қайтариш юзасидан якдил ва ўзаро мақбул ёндашувларнинг ишлаб чиқилишига хизмат қилади.
8 апрель куни Ўзбекистон пойтахтида ШҲТ Минтақавий аксилтеррор тузилмаси (ШҲТ МАТТ) Кенгашининг навбатдаги йигирма саккизинчи мажлиси ҳам бўлиб ўтди. Мажлисда ШҲТга аъзо давлатларнинг терроризм, сепаратизм ва экстремизмга қарши курашиш бўйича 2013—2015 йилларга мўлжалланган ҳамкорлик дастурини амалга ошириш якунлари ҳамда бошқа ҳужжатлар ижроси муҳокама қилинди. 2016 йилнинг тўртинчи чорагида ШҲТга аъзо ва кузатувчи давлатлар делегациялари иштирокида терроризм ва экстремизмга қарши курашиш соҳасидаги ҳамкорлик масалаларига бағишланган халқаро илмий-амалий конференцияни ўтказишга келишилди.
Изоҳ (0)