Термизда фуқаролар йиғинлари раислари ва уларнинг маслаҳатчилари сайловининг ташкилий-ҳуқуқий асослари мавзусида семинар бўлиб ўтди. Унда халқ депутатлари Сурхондарё вилояти, Термиз шаҳри, Бойсун, Музработ, Шеробод, Термиз, Қизириқ, Ангор туманлари Кенгашларининг сайловни ташкил этиш ҳамда ўтказишга кўмаклашувчи комиссиялари, «Маҳалла» хайрия жамоат фонди вилоят бўлими, туман ва шаҳар бўлинмалари масъул ходимлари, ўзини ўзи бошқариш органларининг ишчи гуруҳи раҳбарлари иштирок этди, деб хабар беради ЎзА.
Ўзбекистон Республикаси Олий Мажлиси Сенати Кенгашининг 2016 йил 5 мартда қабул қилинган «Фуқаролар йиғинлари раислари (оқсоқоллари) ва уларнинг маслаҳатчилари сайловига тайёргарлик кўриш ҳамда уни ўтказиш тўғрисида»ги қарорига мувофиқ, жорий йил май-июнь ойларида ўтказиладиган фуқаролар йиғинлари раислари ва уларнинг маслаҳатчилари сайловига Сурхондарё вилоятида ҳам қизғин ҳозирлик кўрилмоқда. Сайловни ташкил этиш ҳамда ўтказишга кўмаклашувчи комиссиялар ташкил этилиб, тадбирлар режаси ишлаб чиқилган. Фуқаролар йиғинларида ишчи гуруҳлари тузилиб, уларга бу борада муайян билим ва тажрибага эга бўлган фаоллар жалб этилган.
Бу йилги сайловларда вилоят бўйича 832 фуқаролар йиғини раиси ва уларнинг 8400 дан ортиқ маслаҳатчиси сайланади.
Семинарда халқ депутатлари маҳаллий Кенгашларининг сайловни ташкил этиш ҳамда ўтказишга кўмаклашувчи комиссияси ва ишчи гуруҳларининг асосий вазифалари, сайловнинг ҳуқуқий асослари, ҳужжатларни расмийлаштириш тартиблари хусусида атрофлича маълумот берилди.
Изоҳ (0)