Рим дербисидаги мағлубиятдан бир неча соат ўтиб, «Лацио» бош мураббий Стефано Пиолини истеъфога чиқарди

Футбол бўйича Италия А Сериясининг 31-турида Римнинг «Лацио» клуби ҳамшаҳри «Рома»дан 1:4 ҳисобида енгилди. Ўйин якунланганидан кўп ўтмай, «Лацио» расмий сайти бош мураббий Стефано Пиолининг истеъфоси ҳақида маълум қилди.

Ўтган мавсум Пиоли бошқарувида «Лацио» 3-ўринни эгаллаб, Европа Чемпионлар Лигасида ўйнаш ҳуқуқини қўлга киритди, бироқ якунда саралашдан муваффақиятли ўта олмади. Жорий мавсум 31-туридан кейин эса Рим клуби 8-ўринни эгаллаб турибди.

«Лацио» Рим дербисининг биринчисида 0:2 ҳисобида енгилганидан ташқари, «Наполи», «Милан», «Ювентус» каби етакчи клубларга қаршилик кўрсата олмади. Италия Кубогини чорак финалда тарк этди.

Клуб расмий сайти баёнотига кўра, «Лацио»ни 2014 йилдан буён ёшлар жамоаси билан ишлаб келаётган собиқ футболчи Симоне Инзаги бошқариб туради.

Январь ойида Римнинг бошқа бир клуби — «Рома» бош мураббий Руди Гарсияни истеъфога чиқариб, унинг ўрнига Лучано Спалеттини тайинлаганди. Шундан кейин «Рома» А Сериядаги 12 та ўйиннинг 9 тасида зафар қучиб, 2 та дуранг ва 1 та мағлубият қайд қилди.