Хитойнинг Сиан Ан шаҳрида бокс бўйича Рио–2016 Олимпиада ўйинлари йўлланмалари учун Осиё ва Океания минтақаларининг қўшма лицензион турнирида ўзбекистонлик Ёдгорой Мирзаева Олимпиада йўлланмасини қўлга киритди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
-51 килограмм вазн тоифасида иштирок этаётган Ёдгорой Мирзаева ярим финал баҳсида Хитой Тайпейи вакили Лин Ю Тиндан 2:1 ҳисобида устун келиб, мусобақа финали ва энг асосийси Рио—2016 Олимпиада ўйинларига йўлланма олди.
Шу тариқа, Ёдгорой Мирзаева Ўзбекистон хотин-қизлари орасида бокс бўйича Олимпиада ўйинларининг йўлланмасини қўлга киритган биринчи спортчи бўлди.
Аввалроқ, -49 килограмм вазн тоифасида иштирок этаётган ўзбекистонлик боксчи Ҳасанбой Дўсматов ярим финалда мўғулистонлик Ган-Эрден Ганхуягни 3:0 ҳисобида мағлуб этиб, мусобақа финали ҳамда Рио–2016 Олимпиада ўйинларига йўлланма олгани ҳақида хабар берилган эди.
Эслатиб ўтамиз, бугун, 31 март куни яна беш нафар ўзбекистонлик боксчи Олимпиада ўйинларининг йўлланмаси учун рингга кўтарилади.
Изоҳ (0)