Футбол бўйича Ўзбекистон миллий терма жамоаси ярим ҳимоячиси Сардор Рашидов ЖЧ—2018 ва Осиё Кубоги—2019 саралаши доирасида 29 март, сешанба куни Тошкентда Баҳрайнга қарши бўлиб ўтган ўйиндан сўнг ЎзМТРК «Спорт» телеканалига интервью бериб, ўз фикрлари билан ўртоқлашди.
Ўзбекистон ва Баҳрайн терма жамоалари ўртасидаги саралаш учрашуви 1:0 ҳисобида мезбонлар ғалабаси билан якунига етди. «Бунёдкор» стадионида ташкил этилган ўйиндаги ягона гол ярим ҳимоячи Сардор Рашидов ҳисобига ёзилди.
«Бугунги ўйин жуда қийин ўтди, тўғрисини айцам, Баҳрайндан бундай ўйин кутмагандик. Худога шукр, ғалаба қозондик, уч очкони қўлга киритдик. Голим билан жамоага ёрдам берганимдан хурсандман. Барча мухлисларга раҳмат айтаман», — деди Ўзбекистон миллий терма жамоаси ярим ҳимоячиси.
«Терма жамоа таркибидаги аксарият футболчилар ўз миллий чемпионатларида кўплаб ўйинларда майдонга тушган ва шу сабабли ҳам бугунги ўйинда кўплаб футболчиларда чарчоқ аломатлари сезилди. Насиб қилса, келаси босқичда бундан-да чиройли ва қизиқарли ўйин кўрсатамиз», — дея қўшимча қилди Сардор Рашидов.
Аввалроқ Ўзбекистон миллий терма жамоаси сардори Одил Аҳмедов Баҳрайнга қарши ўйин қийин кечиши олдиндан тахмин қилинганини айтиб ўтган эди.
Изоҳ (0)