Футбол бўйича ЖЧ—2018 ва Осиё Кубоги—2019 саралаши доирасидаги Ўзбекистон — Баҳрайн ўйини олдидан 28 март куни ташкил этилган матбуот анжумани мезбонлар бош мураббийи Самвел Бабаян журналистларнинг саволларига жавоб қайтарди, деб ёзади «Сhampionat.asia».
Бабаян Баҳрайнга қарши ўйинда жамоаси ғалаба учун ҳаракат қилишини айтаркан, одатда жамоаси ўйинидан қониқмаслигига урғу берди
«Менимча, ҳеч бир мутахассис ўз жамоаси ўйинидан қониқмаса керак. Аммо футболчилар ўзларини кўрсатишга уринишади. Ҳеч бир жамоа доимий равишда ҳужумкор ўйин кўрсата олмайди. Эртага ғалаба қозона олсак, бундан хурсанд бўламан», — деди Самвел Бабаян.
Бабаян миллий терма таркибидаги йўқотишлар ҳақида фикр билдираркан, «Локомотив» вакили Ислом Тўхтахўжаев Филиппинга қарши ўйинда олган жароҳати сабаб, Баҳрайнга қарши майдонга туша олмаслиги мумкинлигини айтиб ўтди.
Мураббий Баҳрайндаги ҳамкасби Серхио Батиста ҳақида илиқ фикрлар билдириб, рақиб кучли мураббийга эга эканини алоҳида таъкидлади. Самвел Бабаяннинг фикрича, Баҳрайн футболида пасайиш йўқ: «Баҳрайн кучсизланди, дея олмайман. Улар ҳамон кучли таркибга эга».
Эслатиб ўтамиз, Ўзбекистон — Баҳрайн учрашуви 29 март, сешанба куни Тошкент вақти билан 18:00 да «Бунёдкор» стадионида бошланади.
Изоҳ (0)