Футбол бўйича ЖЧ—2018 ва Осиё Кубоги—2019 саралаши доирасидаги Ўзбекистон — Баҳрайн учрашуви олдидан меҳмонлар бош мураббийи Серхио Батиста журналистларнинг саволларига жавоб берди. Мутахассис 28 март куни ташкил этилган матбуот анжуманига футболчи Ҳасан ал-Авсвад билан бирга ташриф буюрди, деб ёзади «Championat.asia».
«Яманга қарши ўйиндан сўнг футболчиларимиз тикланишга улгурди, улар Ўзбекистон билан беллашиш учун тайёр. Рақибимиз кучли, аммо Баҳрайн Тошкентга уч очко олиш учун келди. Фалсафамизни ўзгартирмадик, мақсадимиз фақат ғалаба учун майдонга тушиш», — деди Серхио Батиста.
1986 йилги жаҳон чемпионининг Тошкентда кўриб турганидан хурсандлигини яшира олмаган ўзбекистонлик журналист Баҳрайн терма жамоаси ЖЧ—2018 йўлланмасидан умидини узиб бўлганига урғу бериб, бунинг сабабини изоҳлашни сўради.
«Ўзбекистонда эканимдан мен ҳам хурсандман, Сизга раҳмат! Баҳрайнга келганимга 10 ой бўлди. Бу вақт ичида нафақат Баҳрайнда, балки бутун дунёда футбол ўзгарди. Энди футбол янада кучли бўлишни талаб этмоқда. Баҳрайн футбол федерацияси раҳбари билан мамлакат футболини ривожлантириш йўлида ишлашга ҳаракат қиляпмиз», — деди Серхио Батиста.
Матбуот анжуманига келган баҳрайнлик футболчи Ҳасан Ал-Асвадга ўзбекистонлик журналистлар Аъло Хубайл, Талал Юсуф каби футболчиларни эслатиб, ҳозирда уларга муносиб ўринбосар йўқлиги борасида савол берди.
«Сиз айтган ўйинчилар Баҳрайн футболи юлдузлари эди. Биз уларга ҳавас қилиб, катта бўлганмиз. Ҳозир ёшлар кўп, жамоада Батиста ишлашда давом этса, Хубайл каби футболчилар яна етишиб чиқади», — деди Ҳасан ал-Асвад.
Эслатиб ўтамиз, Ўзбекистон — Баҳрайн учрашуви 29 март, сешанба куни Тошкент вақти билан 18:00 да «Бунёдкор» стадионида бошланади.
Изоҳ (0)