Ўзбекистонликлар 23 март куни содир бўладиган Ой тутилишини кузата олмайди
23 март, чоршанба куни Ой тутилиши содир бўлади. Тутилиш ярим соя тусига эга бўлади — Ой Ер соясининг конусига кирмай, ярим соя ҳудуддан ўтиб кетади. Шу боис, «Газета.uz»нинг ёзишича, мазкур ҳодисани оддий кўз билан пайқаб бўлмайди.
Ой тутилишини Осиё, Австралия, Шимолий ва Жанубий Америкадан туриб, шунингдек, Тинч, Атлантика ва Ҳинд океанлари, Арктика ва Антарктидадан кузатиш имконияти мавжуд. Европа ва Африкада осмон ҳодисаси кўринмайди, негаки у пайтда Ой уфқ ортида бўлади.
Ой тутилиши бутунжаҳон мувофиқлаштирилган вақти (UTC) бўйича соат 9:39 да, Тошкент вақти бўйича — 14:39 да бошланади; унинг максимал нуқтаси UTC бўйича соат 11:47 га (Тошкент вақти бўйича — 16:47), якунланиши — 13:54 га (Тошкент вақти бўйича — 18:54) тўғри келади.
Мирзо Улуғбек номидаги астрономия институти ходимлари берган маълумотга қараганда, Ойнинг Ўзбекистон ҳудуди узра чиқиши соат 18:36 да бошланади, илк дақиқаларда эса у ҳали тоғ массивлари ортида бўлади. Шуни инобатга олган ҳолда, шунингдек, иқлим шароитлари туфайли, ўзбекистонликлар амалда Ой тутилишини кузатиш имкониятига эга бўлмайди.
