Америкалик эркак озиқ-овқат нафақасига сотиб ололмаган BMW X6 машинасини олиб қочиб кетди

АҚШнинг Флорида штатидаги Мартин округи полицияси BMW салонидан X6 йўлтанламасини ҳамда бошқа автомобилларга тегишли 60 дона калитни ўғирлаб кетган 36 ёшли Николас Жексонни ҳибсга олди. Motor нашрининг билдиришича, ўғирликдан бир кун олдин эркак йўлтанламасни озиқ-овқат нафақасига сотиб олишга ҳаракат қилган.

17 март куни Жексон автосалонга келиб, кредит карта ҳамда ишсизлар ва паст даромадга эга фуқаролар учун ойлик озиқ-овқат нафақаси тушириладиган EBT картаси ёрдамида тўловни амалга оширмоқчи бўлган. Салон ходимлари Жексоннинг тўловини қабул қилмаган. Эртасига эркак салонга ўғирликка тушган ва ўзи бир кун муқаддам сотиб олишга ҳаракат қилган машинани олиб қочиб кетган.

Лекин ҳуқуқбузар узоққа қочиб кета олмаган — янги машина баки деярли бўш эди, ёқилғи қуйиш учун эса Жексоннинг пули йўқ эди. Натижада у Палм-Ситида полиция қўлига тушди.

Флорида штатида ойлик озиқ-овқат нафақаси 129 долларни ташкил қилади.

Олдинроқ Миннесота штатида 11 ёшли бола бетон қорадиган машинани олиб қочиб кетгани хабар қилинган эди.