Тошкентдаги Алишер Навоий номли кино саройида 6 март куни режиссёр Жаҳонгир Аҳмедовнинг «Мажнун» фильми премьераси бўлиб ўтди. Режиссёри томонидан хусусий киносектордаги «энг узоқ вақт суратга олинган фильм» дея таърифланган, актёр Улуғбек Қодиров учун эса сўнггиси бўлиши мумкин бўлган (уни бўрилар еб қўйиши мумкин эди) мазкур картинанинг илк намойишида журналист Феруз Муҳаммад меҳмон бўлиб, фильм ҳақидаги таассуротлари билан ўртоқлашди.
Дабдабали премьера
Премьера «‘етти кун ичида суратга олинаётган фильмлар’дан бирининг бюджети кетган бўлса керак» деб ўйлаб қоларли даражада ташкил этилди. Очиғи, намойишгача фильм ижодкорларига бироз ачиниб турдим — фильм шунча дабдабага лойиқ даражада бўлмаса, назаримда, улар қайтиб фильм ишламайдиган бўлиб қоладигандек эди.Фильм ҳақида аниқ бир маълумот берилмаётган бир вақтда, режиссёр Жаҳонгир Аҳмедов билан суҳбатлашиб, сценарий Навоийнинг «Лайли ва Мажнун» достонидан олинмаганини билгандим. Шу сабабдан «Мажнун» фильмидан Қайснинг телбаликларини кутганим йўқ. Лекин, тан олишим керак, фильм ҳақидаги гап-сўзлар ва унинг видеоролиги «Мажнун»ни кўришга бўлган иштиёқимни оширган эди.
Фильм кутганимдек эмас, балки...
Ирода исмли журналист қиз калиш заводини танқид қилгани учун бош муҳаррирнинг ғазабига дучор бўлади. Бош муҳаррир унинг курсдоши бўлгани сабаб, Иродага ё калиш заводи раҳбарларидан кечирим сўрашни, ёки ишдан бўшашни таклиф қилади. Қиз иккинчи таклифга кўнган кўйи хонадан чиқиб кетади. Аммо уни ишга қайтариш учун ҳаётда камдан кам бўладиган ҳодиса юз беради — бош муҳаррир ўз ходимининг уйига бориб, «Сардор Комилов деган футболчи ҳақида мақола тайёрласанг, ҳам ишга қайтасан, ҳам маошингни кўтараман», — дейди. Бир тугун ечилай деганда пайдо бўлган бошқа бир тугун томошабинни ўйга солади.Топамиз десак камчиликлар бор. Гиёҳванд йигитга ёрдамга келган тез ёрдам гиёҳванднинг онаси (Раъно Зокирова) ва Ирода (Асал Шодиева) ўртасидаги диалог қачон тугар экан, дея астагина қилган хизмати (бу вақтда ҳар қандай бемор жон беришга улгурар эди) ва ҳоказо. Аммо бу камчиликлар фильм муаваффақияти олдида чақалик аҳамиятга эга эмас. Ҳақиқатан ҳам фильм кутганимдек чиқмаган — у кутганимдан ҳам зиёда.
Рамзларга қурилган фильм
Сюжет томошабинни охиригача ушлаб тура оладиган даражада. Фильм бошидан охиригача рамз, ишораларга қурилган. Фильм бошида Сардор қўрадан хабар олиш учун кетганида, Асад чўпон унга қараб: «Ишқилиб, ўзинг ҳам бўриларга ем бўлмасанг бўлгани», дегани фильм охирида худди шундай воқеа бўлиши ҳақида режиссёрнинг огоҳлантириши эди.Операторлик ишига тасанно
Фимни кўрарканман, қарийб ҳар дақиқа операторнинг ишига қойил қолиб ўтирдим. Фильмда умумий ранг сариқ — хазон ранги. Шунинг ўзи ҳам гўёки бу фильмда висол йўқ, азалий айрилиқ бор, уч Мажнуннинг қисмати эса бир, деб сўзлаётганга ўхшайди. Ироданинг ўзи билан пойтахтдан олиб келган гулини оператор ҳар кўйга солади. Бу тувакдаги гул фильм бошида қаерга қўйилган бўлса, фильм сўнгигача жойидан қўзғатилмайди. Жала қуйганда ҳам, иссиқда ҳам, ой шуъласида ҳам тасвирланган бу гул фильмдаги ягона кўк ўсимлик эди.
«Гримёрни қаердан топдингиз, Жаҳонгир Аҳмедов?!»
Гримёр шу даражада маҳорат билан ишлаганидан ҳар бир актёр умуман бошқа қиёфада намоён бўлади. Фильмнинг фотолавҳалари тарқалган вақтда Матёқуб Матчоновнинг расмларини кўриб, Голливуд актёри Шон Коннери деб ўйлаганлар ҳам бўлганини эшитган эдик. Сардор Комилов тоғдан қайтганида, унинг соқоли олинганлиги ва узоқ вақт қўйилиб, сўнг олинса, соқолнинг ўрни юзнинг бошқа қисмларидан ажралиб туриши ҳам гримёрнинг эътиборидан четда қолдирмаган. Бу фильмни бошқа режиссёрлар ҳам томоша қилаётиб: «Гримёрни қаердан топдингиз, Жаҳонгир Аҳмедов?!», деган фикр ичидан ўтган бўлса ажаб эмас.Актёрлар ўз ўрнида
Актёрлар танлови ўз ўрнида бўлганлиги сабабли бир актёрнинг ўрнида бошқа бир актёрни умуман тасаввур қилиб бўлмайди. Деярли барча фильмда ё боксчи, ё жанговор спорт турларидан бири билан шуғулланувчи йигитни акс эттирадиган Улуғбек Қодировни бу фильмда футболчи образида кўрасиз.«Мажнун»да Мажнунлар қисмати борлигини ҳам таъкидлаб ўтиш жоиз. Асад чўпон муносиб кўрмаганидан ёки бошқа сабабдан муҳаббатига эриша олмаган, Қилич чўпон уйланган бўлишига қарамай, кўнгли ҳали ҳам Асад чўпоннинг қизи Асалда. Шу сабабдан, ҳар сафар маст бўлганида, Асалнинг хунини олиш учун Сардорни ўлдиришга чоғланади. Муҳаммадисо Абдулхаиров сўнгги йилларда ўйнаган энг бутун роли ҳам айнан «Мажнун» фильмида бўлган. Бунгача у ўзининг «Аросат», «Қудуқ» фильмларидаги роллари билан ҳайратларга сабаб бўлган эди. Бу фильмдаги: «Тўй бўлади, ҳамма харажатни мен кўтараман, мен кўтараман», дея ҳайқириб йиғлаши мажнунлик қисматини ойдинлаштиради.
Иккинчи Мажнун — уч йилда етти бор совчи қўйса ҳам, Иродадан розилик ололмаган гиёҳванд бола. Унинг ҳам муҳаббатдан ташқари чигал тақдири бор. Отасини уриб юборган автомобиль эгаси виждон азобидан қутула олмай, гиёҳванднинг онасини ўз никоҳига олади. Ўгай ота ролини Соҳиб Аббосхон жуда яхши ўйнаган. Унинг фильм бошида бир кўриниб, нимадир сабаб тили қисиқ эканлигини кўз қараши ва юз ифодасидан сезса бўлади. Бу хавотир сабаби эса фильм охирида билинади.
Учинчи Мажнун — Сардор Комилов. Улуғбек Қодировнинг ижроси ҳар доимги ижроларидан тубдан фарқ қилади, у яна бир бор томошабинларни ҳайратлантира олди. «У ўлмаган, лекин тирик ҳам эмас» ибораси Асад чўпон томонидан Сардорни назарда тутиб айтилган бўлса-да, бу ибора гиёҳванд бола ва Қилич чўпонга ҳам бирдек тегишли.
Мажнун фильмининг режиссёри Жаҳонгир Аҳмедов ўзининг интервьюларидан бирида Рустам Саъдиевнинг «Барон» фильми ҳақида саволга жавоб берар экан: «‘Барон’ яхши фильм эмас», — дея жавоб қайтаради. «Унда қандай фильм?», — деган навбатдаги саволга: «‘Барон’ — зўр фильм!», — дея жавоб беради. Худди шундай — «Мажнун» ҳам яхши фильм эмас, зўр фильм.
Премьерага келган томошабинлар фильмда ўзларини ҳайратга солган саҳналарни қарсаклар билан эътироф қилиб боришди. Бу қарсаклар 14 тага етганда фильм ниҳоясига етганди. Алишер Навоий номли кино саройида ўтган премьерада 1,8 минг кишилик ва 450 кишилик залларни тўлдириб, шунингдек, яна тахминан 200 нафари тик оёқда туриб кўрган «Мажнун» фильми учун бу қарсаклар ўз ўрнида бўлди, деб ҳисоблайман.
Феруз Муҳаммад,«Дарё» учун махсус
Изоҳ (0)