Қозоғистоннинг Қўстаной вилояти фуқароси судда ўн йилча аввалроқ ўлиб кетмаганини, балки тирик эканлигини исботлашига тўғри келди, деб ёзади «Интерфакс» вилоят суди матбуот хизматига таяниб.
«Қўстаной шаҳар судига 45 ёшли эркак ўлим ҳақидаги фуқаролик ҳолати далолатномаси қайдини бекор қилиш тўғрисидаги ариза билан мурожаат қилди. 2003 йилда эркак Қўстаной шаҳар касалхонасида ётган, у ердан чиққач, ногиронликни белгилашга йўналтирилган. Орадан 12 йил ўтиб, 2015 йилда эркак Аҳолига хизмат кўрсатиш марказига Қозоғистон Республикаси фуқароси шахсини тасдиқловчи ҳужжатни алмаштириш учун мурожаат қилган. Шунда у 2003 йилдан буён ўлган деб ҳисобланиб келишидан хабар топди», — дейилади хабарда.
Қўстаной ҳокими аппаратининг ФҲДЁ бўлими суд рухсатисиз ҳужжатлаштириш ва аҳолини рўйхатдан ўтказиш регистрация пункти базасига тузатиш киритишдан бош тортгач, эркак ариза билан судга мурожаат қилди.
Судда сўроқ қилинган гувоҳлар фуқаронинг шахсини тасдиқлади. Бундан ташқари, фуқаролик иши материалларига аризагўй шунча вақтдан буён тирик бўлиб, ишлагани, пенсия жамғармасига ажратмалар ўтказгани ҳақидаги ёзма далиллар илова қилинган.
Изоҳ (0)