«Челси» жамоаси ҳужумчиси Диего Коста «Эвертон»га қарши (0:2) Англия Кубоги чорак финал ўйинида рақиб ярим ҳимоячиси Гарет Баррини тишлаб олди, деб хабар беради «iSport.ua».
Учрашувнинг 84-дақиқасида «Эвертон» ярим ҳимоячиси Гарет Барри «Челси» ҳужумчиси Диего Костага нисбатан қўпол ўйнаб, уни йиқитди. Асабларини жиловлай олмаган жабрланувчи (Диего Коста) ўрнидан туриб, рақиби томон юзланди ва унга таҳдид қила бошлади. Ушбу вазиятда Коста Баррини билинар-билинмас бўйнидан тишлаб олди.
Учрашувни бошқариб борган ҳакам Майкл Оливер ҳар икки футболчини сариқ карточка билан жазолади. Коста учун бу ўйиндаги иккинчи сариқ карточка бўлгани учун у майдонни тарк этишга мажбур бўлди. 3 дақиқа ўтар-ўтмас Гарет Барри яна ўйин қоидасини бузди ва ҳакам томонидан иккинчи огоҳлантириш олди. Натижада у ҳам майдонни тарк этди.
Қайд этиш жоиз, мазкур учрашувда «Эвертон» жамоаси Ромелу Лукакунинг дубли эвазига «Челси»ни мағлубиятга учратиб, Англия Кубогининг ярим финалига чиқди.
Изоҳ (0)