Тунис хавфсизлик кучлари Ливия билан чегарадаги Бен-Гердан шаҳридаги казармаларга ҳужум қилишга алоқадор деб гумон қилинаётган 16 кишини ҳибсга олди. Бу ҳақда, мамлакат миллий мудофаа вазирлиги матбуот котиби, подполковник Белҳасен Веслатийнинг сўзларига асосланиб, «ТАСС» хабар бермоқда.
«Бен-Гердан шаҳри атрофидаги аксилтеррор операцияси чоғида Тунис хавфсизлик кучлари бўлинмалари томонидан Миллий гвардия казармаларига ҳужумни ташкил қилиш ва уюштиришда алоқадорликда гумондор 16 шахс қўлга олинди. Ҳибсга олинганларга нисбатан тезкор тергов ҳаракатлари бошлаб юборилди», — маълум қилди вазирлик вакили.
Кеча, 8 март куни Бен-Гердан шаҳрида ўтказилган махсус операция натижасида камида 35 нафар террорчи йўқ қилингани, яна етти нафар жангари қўлга олингани ҳақида ахборот берилган эди. Кейинчалик ҳалок бўлган жангарилар сони 37 нафарга, қўлга олинганлари сони эса саккиз нафарга етди.
Операция 7 март куни Тунис—Ливия чегарасини бузиб кириб, Миллий гвардия чегара постларига ҳужум қилган ИШИД жангарилари гуруҳига қарши ўтказилди. Экстремистлар ҳужуми оқибатида тинч аҳолининг етти вакили ва 12 ҳарбий ҳалок бўлди, 17 киши жароҳатланди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)