Актёр, режиссёр ва продюсер Фарҳод Бадалов онасининг оёқларини ювиб, ўпиб қўяётгани тасвирланган фотосуратлар ижтимоий тармоқларда фаол муҳокамаларга сабаб бўлди. Фотосурат 8 март, сешанба куни «Shov-shuv.uz» сайти асосчиси Жасур Ҳамроев томонидан Facebook ижтимоий тармоғига ҳам жойлаштирилган.
«Актёр, продюсер ва режиссёр Фарҳод Бадалов жуда ибратли ишга қўл урди. Респект! Онани қанчалар севиш ва қадрлаш мумкин? Бу борада ҳар кимнинг ўз жавоби бор!», — деб ёзади суратни тармоққа юклаган Жасур Ҳамроев.
Суратларда Фарҳод Бадалов онасининг оёқларини ювиб қўяётгани, ўпиб ҳам қўйгани, шундан сўнг оёқларни сочиқ билан артиб қўяётгани тасвирланган. Сурат остида фикр билдирганларнинг бир гуруҳи Бадаловнинг бу ҳаракатини олқишлаган.
«Ҳамма оналарга шундай ўғилнинг меҳрини кўриш насиб этсин», — деб ёзади фойдаланувчилардан бири. «Э, яшаворинг! Фарзанд бўлса шундай бўлиши керак», — деб қўшимча қилган бошқа бир фойдаланувчи. Яна бир комментатор бу ҳолат «ҳар бир фарзанднинг бурчи экани, ёшлар ўрнак олиши кераклиги»ни таъкидлаган.
Айни вақтда, бир қатор фойдаланувчилар суратдаги ҳолатни эмас, балки бу суратнинг эълон қилинишини кескин танқид остига олган, суратнинг омма эътиборига ҳавола этилишини Фарҳод Бадаловнинг пиари, рекламаси деб баҳолаган.
«Шарманда... Бунақа иш қачондан бери шов-шув билан қўл уриладиган ноёб нарса бўлиб қолди? ‘Онажон, бундоқ туринг, шу жойини расмга олволай’, дейишни ўзи шармандалик. Атрофимда қариб қолган онасининг бошқа заруратларини ҳеч малол олмай, овоза қилмай қилаётган ўғиллар бор. Қилади-да, она ҳам уларни таглигини алмаштираётганида расмга олиб, симёғочга қоқмаган-ку! Шунчаки шарманда», — деб ёзади бир фойдаланувчи.
«Бу яхшику-я, лекин ҳаммага кўз-кўз қилинадиган нарса эмас», — деб ёзади яна бир фойдаланувчи. Бошқа бири эса: «Пиар, риёдан бошқа нарсани кўрмаяпман», — деб фикр билдирган. Салбий руҳдаги комментлар кетма-кетлигидан сўнг, муҳокамаларга пост муаллифи Жасур Ҳамроев ҳамда Фарҳод Бадаловнинг ўзи ҳам қўшилган.
Хусусан, фойдаланувчининг: «Бу суратда пиар, риёдан бошқа нарсани кўрмаяпман», — деган комментига, Бадалов: «Буни кўриш учун ростакасим кўз керак», — деб фикр билдирган. Бошқа бир фойдаланувчининг: «Қўлидаги қимматбаҳо соат ўрнига онанинг оёғи остига яхшироқ гилам тўшаса бўлармиди», — деган гапига, Бадалов: «Сенга нима? Сен 15 қават гиламга ўтқазиб, шундай қил, қойил қоламан. Лекин ковламайман. Бу палос шу ердаги айрим одамлардан қиммат — мен учун ҳам, онам учун ҳам», — деб жавоб берган.
Яна бир фойдаланувчининг: «Шўрлик она», — деб қолдирган изоҳига, Бадалов шундай жавоб ёзган: «Ҳой, ақлли! Бу менинг жаннатим онам. Сенда бўлса керак шўрлик она. Агар бу дунёда она кимлигини билсанг, онамга тил теккизма», — деб жавоб берган. Бунга жавобан, «Шўрлик она» деб изоҳ ёзган фойдаланувчи Бадаловга маслаҳат берган: «Она кимлигини ҳар ҳолда сендан кўра яхшироқ биламан. Сенинг риёкорлигинг сабабидан шу аҳволга тушиб ўтирибдилар. Ундан кўра пост ёзганга айт, ўчириб ташласин».
Суратга нисбатан: «Аҳмоқона!», — деб коммент қолдирган фойдаланувчига жавобан, Бадалов шундай деган: «Менинг ўрнимга ўзингни, онамнинг ўрниларига онангларни қўйиб, яхшилаб ўйлаб кўр, биродар».
«Ҳайвонга қанчалар бермагин таълим, ит бўлур, эшак бўлур, асло бўлмас одамий, деган экан бобомиз Мир Алишер Навоий. Пиарми, бошқами, қўлимдан келди, қилдим. Бу биринчиси ҳам эмас. Қўлингдан келса, қилларинг. Ёқмаса, индамай ўтказвориш мумкин. Гап эгасини топади», — дея алоҳида коммент ёзиб қолдирган Фарҳод Бадалов.
Маълумот учун, Фарҳод Бадалов актёр сифатида бир қатор фильмларда, шунингдек, кўплаб клипларда суратга тушган. Режиссёр ва продюссер сифатида бир неча концерт дастурларини ташкил этган, видеоклиплар тайёрлаган.
Изоҳ (0)