Самвел Бабаян Ўзбекистоннинг 2015 йилдаги энг яхши мураббийи деб топилди

Ўзбекистон миллий терма жамоаси бош мураббийи Самвел Бабаян ОАВ вакиллари ўртасида ўтказилган сўров натижаларига кўра, Ўзбекистоннинг 2015 йилдаги энг яхши мураббийи деб топилди. Бу ҳақда Ўзбекистон футбол федерацияси матбуот хизмати хабар бермоқда.

Ўтган йилнинг июнь ойидан буён Ўзбекистон миллий терма жамоасига бош мураббийлик қилаётган Самвел Бабаян мазкур сўровномада, ўз тарихида илк бор Ўзбекистон Кубогини қўлга киритган Қаршининг «Насаф» клуби устози Рўзиқул Бердиев ҳамда Ўзбекистон U-20 ёшлар терма жамоасини Жаҳон чемпионатида чорак финалга қадар олиб чиққан Равшан Ҳайдаровни ортда қолдирди.

Таъкидлаш жоиз, Самвел Бабаян мураббийлигида Ўзбекистон миллий терма жамоаси ЖЧ—2018 ҳамда ОК—2019 саралаши доирасида жами 4 та учрашувда майдонга тушди ва уларнинг барчасида ғалаба қозонди.

Маълумот учун, Самвел Бабаян 2014 йил якунларига кўра ҳам Ўзбекистонда йилнинг энг яхши мураббийи дея эътироф этилган эди ва мазкур соврин мураббий учун фаолиятидаги кетма-кет иккинчиси бўлди.

Йилнинг энг яхши мураббийи сўровида кучли учлик қуйидагича кўриниш олди:

1. Самвел Бабаян (Ўзбекистон миллий терма жамоаси) – 60 очко
2. Рўзиқул Бердиев («Насаф», Ўзбекистон) – 44 очко
3. Равшан Ҳайдаров (Ўзбекистон U-20 терма жамоаси) – 10 очко

• Одил Аҳмедов 2015 йилда Ўзбекистоннинг энг яхши футболчиси деб топилди

• Игорь Сергеев 2015 йилги Ўзбекистон чемпионатининг энг яхши тўпурари бўлди

• Артур Геворкян 2015 йилги Ўзбекистон чемпионатининг энг яхши футболчиси деб топилди