Тошкентнинг «Пахтакор» футбол клуби Осиё Чемпионлар Лигаси гуруҳ босқичи 1-турида Саудия Арабистонининг «Ал-Ҳилол» жамоаси билан 2:2 ҳисобида дуранг ўйнади. 24 февраль, чоршанба куни Тошкентдаги «Пахтакор» стадионида бўлиб ўтган учрашув ЎзМТРК «Спорт» телеканали орқали жонли эфирда намойиш этилди.
Учрашувда ҳисоб 60-дақиқада «Ал-Ҳилол»нинг фахрий ҳужумчиларидан бири Ёсир ал-Қаҳтоний томонидан очилди. Орадан 10 дақиқа ўтиб ОФК томонидан ОЧЛнинг умидли футболчиларидан бири дея эътироф этилган «Пахтакор» ҳужумчиси Игорь Сергеев ҳисобни тенглаштирди.
Ёсир ал-Қаҳтоний ўрнига захирадан майдонга тушган «Ал-Ҳилол» ҳужумчиси Юсуф ас-Салим ўйин асосий вақти якунланишига олти дақиқа қолганида «Ал-Ҳилол»ни ҳисобда олдинга олиб чиққан бўлса, 88-дақиқада «Пахтакор» ҳимоячиси Даврон Ҳошимов ҳисобни тенглаштирди.
«Пахтакор» — «Ал-Ҳилол» учрашуви якунига етган вақтда мазкур жамоалар ўрин олган «C» гуруҳи доирасидаги иккинчи учрашув Эронда, маҳаллий «Тракторсози» ва БААнинг «Ал-Жазира» жамоалари ўртасида давом этаётган эди. Унда эронлик футболчилар 2:0 ҳисобида ғалаба қозонаётган эди.
Гуруҳ босқичи 2-турида «Пахтакор» сафарда «Ал-Ҳилол»га қарши тўп суради, «Ал-Жазира» эса Абу-Дабида «Тракторсози»ни қабул қилади. Мазкур учрашувлар 2 март, чоршанба куни бўлиб ўтади.
Маълумот учун, 23 февраль, сешанба куни Ўзбекистоннинг бошқа икки клуби — «Локомотив» ва «Бунёдкор» ҳам Саудия Арабистони клубларига қарши майдонга тушган ва ҳар иккаласи ҳам рақиблари билан дуранг ўйнаган эди. 24 февраль куни соат 22:10 да Қаршининг «Насаф» жамоаси сафарда Саудия Арабистонининг «Ал-Аҳли» клубига қарши тўп суради.
Осиё Чемпионлар Лигаси«C» гуруҳи, 1-тур учрашуви24 февраль, чоршанба
«Пахтакор» (Ўзбекистон) — «Ал-Ҳилол» (Саудия Арабистони) 2:2 (0:0)Голлар: Игорь Сергеев (70), Даврон Ҳошимов (89) — Ёсир ал-Қаҳтоний (60), Юсуф ас-Салим (84).Огоҳлантиришлар: Жавоҳир Соҳибов (67), Даврон Ҳошимов (90+2) — Салим ал-Доусарий (57), Сауд Харирий (83), Аҳмад Шараҳилий (90).
«Пахтакор»: Никита Рибкин, Камолиддин Тожиев, Аднан Ораҳовац, Даврон Ҳошимов, Станислав Андреев (Акбар Исматуллаев, 81), Шерзод Каримов (Жалолиддин Машарипов, 67), Владимир Козак, Азим Аҳмедов, Жавоҳир Соҳибов, Жамшид Болтабоев (Жамшид Искандеров, 64), Игорь Сергеев.
«Ал-Ҳилол»: Холид Шараҳилий, Квак Тае-Хви, Ёсир ал-Шаҳроний, Муҳаммад ал-Бурайк, Аҳмад Шараҳилий, Сауд Харирий, Муҳаммад ал-Шлҳуб (Абдуллоҳ Отайф, 64), Карлос Эдуардо, Салмон ал-Фараж, Салим ал-Доусарий (Абдулазиз ал-Доусарий, 90+1), Ёсир ал-Қаҳтоний (Юсуф ас-Салим, 74).
Изоҳ (0)