«ЮКОС» собиқ раҳбари Михаил Ходорковский 2013 йилда турмадан чиқаётганида сиёсат билан шуғулланмаслик ҳақида ҳеч қандай мажбуриятни олмаганини маълум қилди. Бу ҳақда у Лондондаги клубда журналист ва талабалар билан бўлиб ўтган учрашувда айтиб ўтди, деб ёзади «РБК».
«Путин мени ўн йилга қаматди ва унинг ўзи мени онам билан видолашиш учун озод этди, у буни қилмаслиги ҳам мумкин эди. Шунинг учун бизнинг шахсий ҳисоб-китобимиз ёпилди, деб ҳисоблайман. Биз шунчаки сиёсий рақиблармиз», — деди у.
У қамоқдан сиёсий фаолият билан шуғулланмаслик шарти остида чиққанлиги ҳақидаги маълумотни Ходорковский «Кремль тарғиботчилари томонидан ўйлаб топилган уйдирма» деб атади.
Михаил Ходорковский 2003 йилда ҳибсга олинган. 2005 йилда у фирибгарлик учун 9 йил муддатга озодликдан маҳрум қилинган, 2010 йилда эса нефтни ўғирлаганлик ва уни сотишдан тушган даромадни қонунийлаштирганликда айбланиб, 14 йилга қамалган. Муддат у ҳибсга олинган вақтдан бошлаб ҳисоблангани ва муддатнинг турли инстанциядаги судлар томонидан қисқартирилгани натижасида Ходорковский 2014 йилнинг августида озодликка чиқиши керак эди. Аммо тадбиркор инсонийлик характерига эга бўлган вазиятни: онасининг хасталигини пеш қилганидан сўнг, Путин 2013 йил декабрида уни афв этиш ҳақидаги фармонни имзолаган эди.
Изоҳ (0)