Футзал бўйича Ўзбекистон терма жамоаси бош мураббийи Хосе Мендез Осиё чемпионати чорак финалида Ироқ устидан 3:0 ҳисобида қозонилган ғалабадан сўнг матбуот анжуманида иштирок этди, деб ёзади «Uff.uz». Мураббий аввало ўйин ва қўлга киритилган ЖЧ йўлланмаси ҳақида фикр билдирди.
«Ироққа қарши кечган учрашув чиройли ўйиндан кўра ҳар қандай йўл билан бўлмасин, ғалаба қозониш шарт бўлган ўйин эди», — деди Хосе Мендез. Унинг қўшимча қилишича, 6 нафар футзалчи ўйин чоғида шамоллаган ва оғир аҳволда бўлган, аммо майдонда ўзларини кўрсатиб, жанг олиб борган.
Таиланд билан ярим финалда бўладиган учрашув ҳақида гапирар экан, бу жамоа жуда кучли эканлигини таъкидлади. «Улар бизга қарши кечадиган ўйинда фаворит. Аммо биз уларни мағлуб эта оламиз. Улар ҳужумга ўтганда, бизда қарши ҳужум уюштириш имконияти бўлади», — деди мураббий.
«Таиланд таркибида бир нечта жуда кучли футзалчилар бор. Улар жамоалар ўртасидаги фарқни ошириб юбориши турган гап. Аммо бугунгидек мухлислик бўлса, бу фарқ ўз-ўзидан йўққа чиқади. Мен 20 йилдан буён мураббийлик қиламан, аммо ҳали бундай мухлисликни кўрмаганман. Ишқибозлар бизга куч беради», — дея қайд этди Хосе Мендез.
Эслатиб ўтамиз, футзал бўйича Тошкентда давом этаётган Осиё чемпионатининг чорак финалида Ўзбекистон Ироқ устидан ғалаба қозониб, тарихда биринчи марта жаҳон чемпионатига йўлланма олган эди.
Изоҳ (0)