Россиядаги Коррупцияга қарши кураш фонди асосчиси Алексей Навалний Россия президенти Владимир Путин устидан маъмурий даъво берди. Даъво Москванинг Твер тумани судига берилган, деб ёзади Meduza.
Навалнийнинг фикрича, Путин акциядорлари орасида Кирилл Шамалов ҳам бўлган «Сибур» компаниясига Миллий фаровонлик жамғармасидан маблағ ажратиш тўғрисидаги қарорни имзолаётганида, манфаатлар тўқнашуви ҳақида маълум қилмаган.
Аввалроқ ОАВ томонидан Кирилл Шамалов Владимир Путиннинг қизи деб тахмин қилинаётган Катерина Тихонованинг эри сифатида тилга олинган эди. Навалнийнинг таъкидлашича, Путин «Коррупцияга қарши кураш тўғрисида»ги қонунни бузган.
Бир қатор ОАВларнинг суриштирувига кўра, Владимир Путиннинг кичик қизи деб тахмин қилинаётган, «Иннопрактика» фонди директори Катерина Тихонова «Сибур» компанияси эгаларидан бири Кирилл Шамаловнинг никоҳида эканлиги 2015 йил ноябрида Reuters’нинг суриштирувидан сўнг маълум бўлганди. Мазкур суриштирувда Шамалов ва Тихонованинг Францияда 3,7 миллион долларлик вилласи борлиги ҳақида ҳам сўз боради.
Катерина Тихонова Путиннинг қизи экани ҳақидаги маълумотларнинг расмий тасдиғи ҳозирча йўқ.
Кирилл Шамалов 2014 йилдан «Сибур» компаниясининг 20 фоиз акцияларига эгалик қилади. У «Россия» банки эгаларидан бири Николай Шамаловнинг ўғлидир.
Изоҳ (0)