Маслаҳатчилар федерал жюриси ҳуқуқ-тартибот ходимининг ғайриқонуний ҳаракатлари оқибатида жароҳат олган Флорида штатининг қора танли фуқаросига 23,1 миллион доллар товон тўлаш ҳақида ҳукм чиқарди. Мазкур қарор 3 февраль, чоршанба куни Форт-Лодердейл шаҳрида бўлиб ўтган эшитувлардан сўнг қабул қилинди. Бу ҳақда «ТАСС» хабар бермоқда.
Ҳодиса 2013 йилнинг сентябрида содир бўлди. Палм-Бич округи шерифи ўринбосари Адамс Лин велосипедда кетаётган 22 ёшли Донтрелл Стивенсни йўл ҳаракати қоидаларини бузгани учун тўхтатади. Линнинг даъво қилишича, у жарима ёзиб бераётган чоғда қора танли йигит белидан қора рангли буюмни олади, буни шериф ёрдамчиси тўппончага ўхшатади. Лин Стивенсга қарата камида тўртта ўқ узади ва йигитни зудлик билан касалхонага элтишга тўғри келади.
Кейинчалик йигит қуролсиз бўлгани, унинг қўлидаги буюм мобил телефон эканлиги маълум бўлади. Адвокатлар яраланганидан сўнг қиммат турадиган қайта тикланиш муолажаларини олишга мажбур бўлган Стивенсга қўшимча даволаниш учун 5 миллион, жисмоний ва маънавий зарар учун эса 18 миллион доллар тўлаб берилишини талаб қилган. Линнинг ҳаракатларини ғайриқонуний деб топган жюри ҳимоянинг далилларига қўшилди.
Энди жабрдийдага товон тўлаб берилишини Флорида қонунчилик йиғини маъқуллаши керак. Шериф бошқармаси вакиллари чиқарилган ҳукмдан норози бўлган ва апелляция берилишини маълум қилган.
Изоҳ (0)