Италия қўшимча равишда Ироққа 130 нафар ҳарбий юбормоқчи

Италия қўшимча равишда Ироқнинг Эбриль шаҳрида қўним топадиган 130 нафар аскар юбормоқчи. Бу ҳақда La7 телеканали берган маълумотларга асосан «РИА Новости» хабар қилмоқда.

Италия Мудофаа вазири Роберта Пиноттининг маълум қилишича, шу мазмундаги қарор ҳукуматнинг 5 февраль, жума куни бўлиб ўтадиган навбатдаги йиғилишида қабул қилинади. Ироққа юборилаётган ҳарбийларнинг асосий вазифаси жанг майдонида яраланганларга ёрдам кўрсатишдан иборат бўлиб, шу мақсадда уларга вертолёт ажратилади.

Таъкидланишича, Париж томонидан Италиянинг Ироқдаги ҳарбий иштирокини кучайтириш тўғрисидаги илтимосига жавобан, Ироққа қўшимча куч юбориш ҳақида қарор қабул қилиниб, бу Италиянинг терроризмга қарши курашиш йўлидаги навбатдаги салмоқли ёрдами сифатида қабул қилинмоқда.