Россия президенти матбуот котиби Дмитрий Песков Оқ уй матбуот котиби Жош Эрнестнинг Владимир Путинга нисбатан коррупция билан боғлиқ айбловларини ҳақоратли деб атади. Бу ҳақда Meduza хабар бермоқда.
«Давлат раҳбарига қарата айтилган бундай ҳақоратлар қуруқ гап — бу шунчалик равшанки, тўғрисини айтганда, қандайдир таҳлилни ҳам талаб қилмайди», — деди Песков. У Америка маъмурияти ўз фикрига ойдинлик киритишига умид билдириб қолди.
Песковнинг сўзларига кўра, Путин Оқ уй томонидан унга қарата айтилган айбловлардан хабардор. Россия президенти уларни номуносиб ва номақбул деб ҳисоблайди.
Аввалроқ АҚШ молия вазирлиги вакили Россия президенти коррупцияга алоқадорлигини, унда тегишли ахборот борлигини айтган эди. Песков эса АҚШ молия вазирлиги вакилининг Россия президенти коррупцияга алоқадорлиги ҳақидаги гапларини уйдирма деб атаган эди. Кейинроқ АҚШ маъмурияти молия вазирининг Россия президенти Владимир Путиннинг коррупциялашганлиги ҳақидаги баёнотини ўз позициясини энг яхши ифодаси деб ҳисоблашини маълум қилган эди.
Изоҳ (0)