Россиянинг «НТВ» телеканали Людмила Путинанинг эҳтимолий янги турмуши ҳақида сюжет тайёрлади, дея хабар бермоқда «РБК». Уни фақат Узоқ Шарқдаги томошабинлар кўриши мумкин бўлди.
«Яна турмуш қурдими?» деб номланган ролик уч дақиқа давом этди. У Владимир Путин собиқ хотинининг шахсий ҳаёти интернетда қандай муҳокама қилинаётгани ҳақида сўзлаб беради.
«Никоҳ ҳақидаги гувоҳномани ҳеч ким кўргани йўқ, турмуш қурганлик ҳақидаги хулоса Путинлар эгалик қилган кўчмас мулк ҳужжатлари асосида чиқарилди», — дейилади сюжетда. Шунингдек, Людмила Путина Очеретная фамилиясига ўтганлиги тахмин этилади. «Унинг ҳақиқий деб тахмин қилинаётган Facebook’даги саҳифасида аввалги исм-шариф турибди. У мушуклар расмини қўяди, тармоқ тестларида қатнашади, дўстлари билан мулоқот қилади, улар орасида жамият арбоблари йўқ, аммо эҳтимолий турмуш ўртоғи — Шахслараро муносабатларни ривожлантириш маркази раҳбари 38 ёшли Артур Очеретний бор», — дея таъкидланади кўрсатувда.
58 ёшли Людмила Путина Шахслараро муносабатларни ривожлантириш маркази раҳбари — 37 ёшли Артур Очеретнийга турмушга чиққани, шу сабабли фамилиясини ўзгартиргани ҳақида 25 январь куни хабар берилди.
26 январь куни Россия президенти Владимир Путиннинг матбуот котиби Дмитрий Песков бу хабарлар юзасидан изоҳ беришдан бош тортди. Қайд этиш жоиз, Россия президенти Владимир Путин ва унинг аёли — Людмила Путина 2013 йилда ажрашишга қарор қилганди. Шундан бери Путин расман бўйдоқ саналади.
Изоҳ (0)