Британиялик режиссёр Чарли Лайн Фильмларни таснифлаш бўйича Британия кенгаши (BBFC)ни бўялган деворнинг қуриши жараёнини ўн соат давомида томоша қилишга мажбур этди, деб ёзади Meduza. Шу тариқа, у кинодаги цензурага ҳамда BBFC’нинг одамлар нимани кўриши мумкин, нимани кўриши мумкин эмаслиги бўйича ҳукм чиқаришдаги ролига қарши чиқди.
Цензорларни «жазолаш» мақсадида Лайн девордаги бўёқнинг қуриши акс этган фильмни суратга олди. Сўнг ўз асарини таснифлаш учун маблағ йиғишга киришди — BBFC’нинг хизматлари пулли бўлиб, ташкилот фильмнинг ҳар бир дақиқаси учун 8,51 фунт стерлингдан олади. Унинг краудфандинги муваффақиятли бўлиб чиқди — 686 киши режиссёрга қарийб 6 минг фунт стерлинг кўчириб ўтказди.
20 январь куни Лайн фильм нусхасини BBFC’га топширди. Ташкилот асарни томоша қилиб чиқиш учун икки нафар экспертини жалб қилди. Улар фильмни икки кун томоша қилди (экспертларнинг иш куни 9 соат).
Ниҳоят 26 январь куни BBFC ҳукм чиқарди: Лайннинг фильми «Ҳамма учун» категориясига тегишли.
Изоҳ (0)