Унинг исми ноёб, кўзлари қувноқ ва, ўз тили билан айтганда, «юрагида кичкина тешикча бор». Қул Ҳожи Аҳмад Yassaviy Жамолиддинов исмли чароғон болакай 14 ёшда. «Юракдаги кичкина тешикча» — бу туғма юрак хасталиги, аниқроғи, 17 кунлик болакайда аниқланган юрак қоринчаларининг пардалари нуқсони.
Ўзининг ташхиси тўғрисида Ҳожи Аҳмад ҳамма нарсани билади ва менга юрак бўлмачаси, ўнг ва чап қоринчалари ва улардаги қон босими фарқи тўғрисида завқ билан сўзлаб берди. Шундай ташхис билан учувчи бўлмаслик хавфи борлигини ва жанговар хўрозларини етим қолдириши мумкинлигини ҳам билади.
Айнан шундай деди: «Касалхонадалигимда менинг даканларим худди етимдек қолди, юракни тезроқ тузатиш керак». У ишламай қолган нарсаларни тузатишни ёқтиради, ҳатто барча қўл силтаб ташлаган нарсаларни ҳаётга қайтаришни яхши кўради. Фақат нарсаларни эмас. Икки йил олдин совға қилинган хўрозлар — даканлар касал эди ва Ҳожи Аҳмад ўз қўли билан паррандаларнинг кўкрагидан ҳавони шприц билан тортиб олиб, даволаб, оёққа турғазди.
Унинг табиати худди даканларникидек — жасур, лекин юраги дилкаш ва у мумкин қадар зудлик билан жарроҳлик йўли билан даволанишга муҳтож эди. Болалар кардиологиясида «қайтмаслик нуқтаси» номли тушунча мавжуд. Бу дегани — вақт қўлдан бой берилган ва юракни жарроҳлик йўли билан даволашга имкон йўқ.
Болалар кардиожарроҳлик маркази раҳбари Дониёр Пирназаровниниг айтишича, юрак хасталигига чалинган болаларга жарроҳлик усулини мумкин қадар эрта, хасталикнинг шакли ўзгармагунча қўллаш зарур. Шунда бола ҳам ўзини тезроқ ўнглаб олади, юрак ҳам меъёрида ишлайди.
Ҳожи Аҳмаднинг оиласида уч фарзанд бор, онаси — уй бекаси, оилани ота боқади, у ҳам бўлса пилорамада бир қўлини йўқотган. Бир сўз билан айтганда, бола учун зарур операция оксигенатор мосламасининг нархи қимматлиги сабаб қолдирилиб келинаётган эди. Оксигенаторсиз очиқ юракда жарроҳлик амалиётини амалга ошириш мумкин эмас. Бир оксигенатордан фақат бир маротаба фойдаланилади ва улар очиқ юракда ўтказилаётган операция давомида сунъий қон айлантирувчи қурилма насослари билан биргаликда ишлатилади.
Ўзбекистонда болаларни даволаш бепул, лекин оксигенаторлар ҳаммага ҳам етмайди. Уни сотиб олишга эса ҳамманинг ҳам қурби етавермаслиги ҳақида гапирмаса ҳам бўлади.
2015 йил ноябрида «Сочная Долина» савдо маркаси «Биргаликда ҳаётларни қутқарамиз» хайрия акциясини ўтказди. 1—30 ноябрь кунлари «Сочная Долина» шарбатининг сотилган ҳар қутисидан тушган пулнинг муайян бир қисми оғир хасталикка чалинган болаларнинг операциясига йўналтирилди. Акция давомида 15 нафар болани даволаш учун етарли пул йиғилди. Пул маблағлари Тошкент педиатрия институтининг клиникаси ҳисоб-рақамига ўтказилди. Болалар кардиожарроҳлик маркази шифокорлари ўзларининг барча беморларини билади — улар орасидан бутун республика бўйлаб кам таъминланган оилалардан юрак хасталигига чалинган 15 болакай танлаб олинди.
Ҳожи Аҳмад билан олиб борган суҳбатимиз операциядан олти кун ўтиб уюштирилди, у тез-тез соатга қараб қўяр — уйга шошиларди. «Биласизми, мен бобомни жуда соғиндим, Андижонгача 6—7 соат йўл босиш керак, даканларим ҳам мени соғинган бўлса керак…», — деб, кўкрагидаги янги боғловни силаб-силаб қўярди. Унинг бахтиёр ва, айни вақтда, йўл ташвишига тушган онаси: «Довонда ҳаво очиқ бўлсин-да», — дерди. Унга ғамхўрлик билан қараб, ўғилчаси: «Ташвишланманг, аяжон, мен бор жойда доим қуёш чарақлайди», — деб қўйди.
Бу «Биргаликда ҳаётларни қутқарамиз» акцияси доирасидаги ўн беш «юрак ҳикояларидан» биринчиси ва бу ҳикояларнинг давоми бор.
Реклама ҳуқуқи асосида
Изоҳ (0)