Самвел Бабаян: Мухлислар олдида ўз шаънимизни тиклашимиз лозим эди

Ўзбекистон ва Яман олимпия терма жамоалари ўртасидаги ўйиндан кейин Самвел Бабаян ўз фикрлари билан ўртоқлашди, деб хабар қилади «Stadion.uz».

«Ушбу мусобақага тайёргарлик жараёнида яратган ўйин услубимизни сифатли тарзда кўрсатишимиз керак эди. Мухлислар олдида ўз шаънимизни тиклашимиз лозим эди. Аввалги иккита ўйиндаги мағлубиятлар тасодиф, асоссиз ва адолатсиз бўлганини барчага исботлашимиз керак эди.

Ушбу таркибдаги футболчилар яқин йилларда миллий терма жамоа аъзосига айланади. Уларнинг айримлари ҳозирданоқ бош жамоамизда ўйнашга улгурди, айримлари асосий таркиб ўйинчиси ҳисобланади. Ушбу мусобақада айрим чизиқлардаги муаммолар билан ўйнадик. Шунга қарамай, иқтидорли ёшлар эрта-индин Ўзбекистон миллий терма жамоаси шарафини муносиб ҳимоя қилади, деб ўйлайман», — деди Самвел Бабаян.

Эслатиб ўтамиз, Ўзбекистон олимпиячилари U-23 Осиё чемпионати гуруҳ босқичида битта ғалаба ва иккита мағлубият қайд этиб, гуруҳда қолиб кетди.