Тунисда меҳмонхоналарнинг салкам 50 фоизи фаолиятини тўхтатди

Тунисда фаолият кўрсатаётган 570 та меҳмонхонадан салкам ярми — 270 дан зиёди ёпилди. Мамлакатда содир этилган терактлардан сўнг сайёҳлар оқими кескин камайди, бу эса хорижий меҳмонхоналар маҳаллий бозорни тарк этишига олиб келди, дея хабар беради «ТАСС».

Тунис туризмига Европа, хусусан, Германия, Франция, Италия ва Испаниядан келадиган сайёҳларнинг мамлакатда дам олишдан воз кечгани энг катта зарба бўлди. «2015 йилда бир миллионга яқин сайёҳни йўқотдик. Террорчилар уюштирган ҳужумлар туфайли Ғарбдан келадиган сайёҳлар оқими 50 фоизга камайди. Терактлар қайтарилиши эҳтимоли важи билан бир қатор мамлакатларда Тунисга бориш ман этилди», — дея таъкидлаган Тунис туризм вазири Селма Элумми Рекик.

Бўҳрондан энг кўп зарар кўрган минтақалар қаторида Кап Бон яримороли (75 та меҳмонхона ёпилган) ва Жерба-Зарбис ороли (64 та меҳмонхона фаолиятини тўхтатган) қайд этилган.