Россиялик мансабдорлар ўртасидаги энг оммабоп автомобиллар аниқланди
Россиялик амалдорлар орасида энг оммабоп автомобиль Ford Focus ҳисобланади, унинг ҳиссасига вазирлик ва идоралар автопаркининг бешдан бир қисми тўғри келади, деб ёзади Meduza.
«РБК» Россия Ички ишлар вазирлиги, Фавқулодда вазиятлар вазирлиги, Жазоларни ижро этиш федерал хизмати, Наркотиклар айланишини назорат қилиш бўйича федерал хизмат, Тергов қўмитаси, Соғлиқни сақлаш вазирлиги, Президент ишлари бўйича бошқарма каби ташкилотлар ва уларнинг ҳудудий бўлинмаларига тегишли автомобиллар ҳақидаги маълумотларни таҳлил қилиб, шундай хулосага келди.
Вазирлик ва идоралар автопаркларида иккинчи ўринни УАЗ «Патриот», учинчи ўринни Ford Mondeo эгаллади.
Люкс автомобиллар категориясида мансабдорлар 632, 525, 750 сериясидаги BMW, Audi A6, Mercedes E350 ва S350, шунингдек, Volkswagen Passat’ни афзал кўради.
Энг қимматбаҳо машиналар президент, бош вазир, чет мамлакат етакчилари, қатор олий тоифали давлат мансабдорларига хизмат кўрсатувчи Федерал қўриқлов хизматига тегишлидир.
