2015 йилнинг декабрь ойида Тошкент шаҳридаги хонадонлар ижарасининг ўртача нархлари ноябрь ойи билан солиштирганда 5% га қимматлашди ва 1 квадрат метр учун ижара қиймати 6,9 шартли бирликни ташкил эта бошлади.
Декабрь ойида квартираларнинг ижара ҳақи шаҳарнинг кўпгина туманларида қимматлашди. Хусусан, Олмазор ва Шайхонтоҳур туманларида ижара ҳақининг энг юқори ўсиш суратлари кузатилди. Сирғали ва Учтепа туманларида эса ижара ҳақи арзонлашди.
Тошкент шаҳри бўйича ижарага бериладиган энг қиммат хонадонлар Миробод туманида жойлашган бўлиб, ушбу ҳудудда 1 кв.м учун ижара нархи 2015 йилнинг декабрь ойида 4% га ошиб, 8,3 ш.б. ни ташкил этди. Ижарага бериладиган энг арзон квартиралар эса Тошкент шаҳрининг Сирғали туманида жойлашган бўлиб, мазкур ҳудудда квартиралар ижарасининг ўртача 1 квадрат метри 3,1 ш.б. ни ташкил этмоқда.
Шуни таъкидлаш жоизки, туманлар ичидаги нархларда ҳам анча сезиларли тафовутлар мавжуд. Хусусан, ижарага бериш учун таклиф этилаётган хонадонларнинг энг қимматлари Тошкент шаҳрининг Тарас Шевченко ва Нукус кўчаларида ҳамда Марказий Универмаг ва Ойбек метроси атрофларида жойлашган.
Шунингдек, ижарага берилаётган хонадонлар сони бўйича Миробод ва Мирзо Улуғбек туманлари етакчилик қилмоқда, мазкур туманлар Тошкент шаҳри бўйича жами ижарага берилаётган хонадонлар бўйича таклифнинг 56 фоизини ташкил этмоқда. Ўз навбатида ижарага берилаётган хонадонларнинг кейинги ўринлари Юнособод (умумий таклифнинг 16 фоизи) ва Яккасарой (10 фоиз) туманларига тўғри келади.
Талаб нуқтаи назарида, Тошкент шаҳрида икки ва уч хонали квартираларга қизиқиш катта бўлиб, улар жами талабнинг 60 фоизини ташкил этади.
Тошкент шаҳрида ижарага берилаётган хонадонларнинг ўртача нархи: 1 хонали квартиралар учун 259 ш.б., 2 хоналилари учун 374 ш.б. ни ва 3 хоналилари учун 628 ш.б. ни ташкил этди.
Баъзи туманлар бўйича квартиралар ижара нархлари (ш.б. да кўрсатилган)
| 1 хона | 2 хона | 3 хона | |
|---|---|---|---|
| Миробод | 330 | 486 | 777 |
| Яккасарой | 243 | 410 | 653 |
| Мирзо Улуғбек | 237 | 331 | 582 |
| Шайхонтоҳур | 177 | 310 | 657 |
| Юнусобод | 238 | 333 | 480 |
| Яшнобод | 173 | 267 | 515 |
| Тошкент шаҳри бўйича ўртача нарх | 259 | 374 | 628 |
Ушбу маълумотлар «UyBor.uz» порталида ижарага берилаётган таклифларининг ўртача нарх кўрсаткичлари асосида тайёрланган. «Uybor.uz» ва / ёки «Дарё» нашри маъмурияти, ушбу ҳисобот асосида қабул қилинган қарорлар учун жавобгар эмас. Кўчмас мулк ижараси масаласида профессионал маслаҳатга эга бўлиш учун Кўчмас мулк агентликларига мурожаат этинг.
Реклама ҳуқуқи асосида
Изоҳ (0)