КХДР мамлакат шимоли-шарқида водород бомбасини муваффақиятли тарзда синовдан ўтказди. Бу ҳақда Шимолий Корея марказий телевидениеси эълон қилди, дея хабар бермоқда «РБК».
Ҳукумат баёнотида қайд этилишича, агар мамлакат суверенитетига дахл қилинмаса, Пхеньян ядровий қуролдан фойдаланмайди. Шимолий Корея ўз ядровий салоҳиятини ривожлантириш бўйича ишларни давом эттиришни режалаштираётганини ҳам маълум қилди.
КХДР бунгача уч марта — 2006, 2009 ва 2013 йилларда ядровий синовларни ўтказган. Жорий синовлар Ким Чен Ин ҳокимият тепасига келганидан бери амалга оширилган иккинчисидир. Бу каби синовларни ўтказгани учун, БМТ Хавфсизлик кенгаши КХДРга нисбатан санкциялар жорий этган.
Жанубий Корея разведкаси уч кун аввал КХДРдаги Пунгери полигонида фаолликни қайд этганди, бу ҳолат Шимолий Корея ядровий синовларни ўтказишга тайёргарлик кўраётгани билан боғлиқ, деб тахмин қилинганди.
2015 йил декабрь ойида Шимолий Корея етакчиси Ким Чен Ин КХДР ўз суверенитетини нафақат ядровий, балки водород бомбаси билан ҳам мудофаа қила олиш қобилиятига эга эканлигини эълон қилганди. Бу КХДР водород бомбаси устида иш олиб бораётгани билан боғлиқ илк расмий баёнот эди.
6 январга ўтар кечаси қатор мамлакатларнинг сейсмология хизматлари Шимолий Кореядаги ядровий полигонга яқин ҳудудда 5,1 магнитудали зилзила қайд этилгани, ерости силкинишларига техноген омил (ядровий синовлар) сабаб бўлгани ҳақида ахборот берганди.
Изоҳ (0)