Аргентина баҳсли Фолкленд оролларига бўлган суверенитети қайта тикланишига интилишда давом этади. Бу ҳақда 3 январь куни Аргентина ташқи ишлар вазирлиги оролга Британия қўшинлари туширилганига 183 йил тўлишига бағишланган баёнотида маълум қилди, деб ёзади «РИА Новости».
«Бугун, давом этаётган истилога 183 йил тўлганида, Аргентина халқи ва ҳукумати Мальвина ороллари, Жанубий Георгия, Жанубий Сандвич ороллари ва туташ денгиз ҳудудлари устидан суверенитети учун бўлган ҳуқуқлари ҳақида эълон қилади», — дейилади баёнотда.
Унда таъкидланишича, талаш ороллар устидан назоратни қайта тиклаш «давлат сиёсати бўлиб, Аргентинанинг барча фуқаролари истакларига мос тушади».
Фолкленд ёки, аргентиналиклар атагани каби Мальвина, ороллари Аргентина ва Буюк Британия ўртасидаги азалий баҳс мавзусидир, у 1982 йилда қуролли низони келтириб чиқарган. Аргентина Британия 1833 йилдан буён назорат қилиб келадиган оролларда куч билан ўрнашиб олишга ҳаракат қилди. 72 кунлик урушда Британия ғалаба қозонди.
Изоҳ (0)