Мьянма расмийлари Таиланд раҳбариятидан икки нафар мьянмаликка нисбатан чиқарилган ўлим жазосини қайта кўриб чиқишни сўрамоқда. Бу ҳақда «ТАСС» хабар берди.
Таиланд ҳукуматига тегишли илтимос Мьянма қуролли кучлари бош қўмондони генерал Мин Аунг Хлаинг номидан юборилган. Шунингдек, 26 декабрь, шанба куни мамлакатда Таиланд расмийларидан «ноҳақ чиқарилган ҳукм» бекор этилиши талаб қилинган оммавий намойишлар ҳам бўлиб ўтган.
24 декабрь куни Таиланддаги Сураттхани вилоят суди 2014 йил сентябрида Тао оролида британиялик сайёҳлар Дэвид Миллер ва Ханна Визерижни ўлдиришда айблаб, мьянмалик Зав Лиин ҳамда Вин Зав Тунни ўлим жазосига ҳукм қилди. Улар аввалига айбига иқрор бўлган, бироқ кейинчалик қийноқлар остида бунга мажбур бўлганини билдириб, кўрсатмаларидан воз кечган. Шундай бўлса-да, суд уларнинг айбини исботланган деб ҳисобламоқда.
Изоҳ (0)