«Ўзбекистон темир йўллари» локомотивлар паркини янгилашнинг иккинчи босқичи доирасида Хитойда ишлаб чиқарилган 11 дона O‘z-ELR электровозини харид қилди. Бу ҳақда ЎзА хабар бермоқда.
Электровозлар Хитойнинг CNTIC консорциуми – Далянь электровозсозлик заводида ишлаб чиқарилган бўлиб, ушбу компания локомотивлар паркини янгилашда «Ўзбекистон темир йўллари» акциядорлик жамияти билан бир неча йилдан бери яқин ҳамкорлик қилиб келмоқда.
– Янги электровозлар оғир юкларни тоғ шароитида ташишга мослаштирилган бўлиб, шу турдаги бошқа локомотивларга нисбатан бир қатор афзалликларга эга, – дейди «Ўзбекистон темир йўллари» акциядорлик жамияти бошқарма бошлиғи Нусратилло Абдуллаев. – Жумладан, замонавий тормозланиш тизимлари ва комплекс хавфсизлик қурилмалари ўрнатилгани боис электр энергияси сарфи 5—8 фоизга камаяди. Экологик хавфсизлик бўйича халқаро талабларга жавоб берадиган локомотив Toshiba (Япония) компаниясида ишлаб чиқарилган экологик тоза асинхрон электр двигателлари, носозликларни таҳлил қиладиган микропроцессор тизими билан жиҳозланган. Сарфланадиган материаллар ресурси замонавий материаллар қўлланиши ҳисобидан 15 фоизга кўпайган, электровознинг ҳаво резервуари ҳар қандай иқлим шароитида ундан ишончли фойдаланишга хизмат қилади.
Электровознинг қуввати 7200 кВтга тенг бўлиб, конструкцион тезлиги соатига 120 километрни ташкил этади. Янги локомотивларда қўлланилган замонавий технологиялар электр энергиясини тежаш баробарида тепловозларда ишлатилаётган ёнилғи сарфи 2—2,5 марта камайишига олиб келади.
«Ўзбекистон темир йўллари» акциядорлик жамияти томонидан харид қилинган янги O‘z-ELR электровозлари юк ташиш ҳажмини янада кўпайтириш имконини беради.
Изоҳ (0)