«PopCorn.uz» нашри энг кўп томошабин жалб қилган ўзбек клиплари рейтингини тузиб чиқди.
Топ-5 талик рейтингдан октябрь ойида YouTube видеохостинг хизматига жойлаштирилган видеоклиплар жой олган.
Топ-5 таликнинг 5-поғонасида Рашид Холиқовнинг «Шаҳло кўзли маликам» видеоклипи жой олди. Мазкур видеоклип 16 октябрь куни жойлаштирилган бўлиб, бугунги кунга қадар томоша қилганлар сони 106 минг нафар кишини ташкил этади. Видеолкип режиссёри — Ёдгор Носиров.
4-поғонани Баҳриддин Зуҳриддинов ва «Божалар» гуруҳи ижросидаги «Ҳадича» видеоклипи банд қилди. Клипмейкер Жонрид Сагдиев режиссёрлигида тасвирга туширилган, 16 октябрь куни жойлаштирилган клипни бугунги кунга қадар 171 мингдан ортиқроқ мухлислар томоша қилган*.
Рейтингнинг 3-поғонаси Ўзбекистонда хизмат кўрсатган артист Зиёданинг «Яхши қол» клипига насиб этди. 6 октябрь куни жойлаштирилган ушбу клипдан ҳозиргача 202 мингдан кўпроқ мухлислар баҳраманд бўлган. Қизиқарли сюжетни ўз ичига олган видео асарда бош ролларни Асал Шодиева ва Азиз Раметов ижро этган.
Ўзбекистонда хизмат кўрсатган артист Сардор Раҳимхон ижросидаги «Санамжон» қўшиғига ишланган клип рейтингда 2-ўринни эгаллади. Ушбу таронанинг видеоклипи 12 октябрь санасида жойлаштирилган ва ундан бугунги кунга қадар 254 мингдан ортиқ томошабинлар баҳра олган.
Жасур Умировнинг «Кабутарим» таронасига яратилган видеоклип топ-5 талик рейтингнинг биринчи поғонасини банд этди. Клипмейкер Наримон Султонхўжаев режиссёрлигидаги клипдан айни дамгача баҳраманд бўлганлар сони 481 мингтадан ортиқроқ мухлисни ташкил этади.
Изоҳ* — «PopCorn.uz» нашри рейтингида Зиёданинг «Яхши қол» клипи 4-ўрин, Баҳриддин Зуҳриддинов ва «Божалар» гуруҳи ижросидаги «Ҳадича» қўшиғи клипи 3-ўринда кўрсатилган. Аммо «Яхши қол» клипи YouTube орқали кўпроқ кўрилгани учун «Дарё» нашри клиплар ўрнини алмаштирди.
Изоҳ (0)