Ўзбекистон мобил алоқа операторлари Янги йил оқшомида алоқа тармоғида носозликлар бўлмаслиги, хусусан, байрам табриклари, қўнғироқлари ўз вақтида амалга оширилиши учун тегишли чоралар кўрмоқда, дея хабар бермоқда «Даракчи» газетаси.
Хусусан, «Билайн-Ўзбекистон» ўз SMS-марказида юкламалар ҳажми ошиб кетмаслиги учун қисқа муддатли режали иш тартибига ўтади, асосий тизимда эса профилактик қайта юклашни амалга оширади.
«31 декабрь куни барча ҳудудларда тармоғимиз сиғимини кенгайтирамиз. Унутмаслик керакки, мобил операторларнинг сифатли ишлаши электр таъминотига ҳам боғлиқ. 1 январга ўтар кечаси ҳаво қанча совуқ бўлса, юклама ҳам шунча ортади», — деди «Билайн-Ўзбекистон»нинг жамоатчилик билан алоқалар хизмати раҳбари Ораз Абдураззоқов.
UzMobile вакилларининг маълум қилишича, Янги йил кечаси ишнинг авж нуқтаси 23:00 да бошланади. «Ўша куни операторларимиз сонини кўпайтирамиз», — дейди компания call-маркази 1-тоифали мутахассиси Бахтиёр Мирҳабибов. UMS оператори ҳам Янги йил кечасида call-марказдаги операторлар сонини оширишини маълум қилди.
«Компаниянинг техник блоки махсус ишлаб чиқилган режа асосида ишлаяпти. Мазкур блок тармоқни меъёридан ошган юкламалар режимига улайди. Бу эса катта миқдордаги овозли ва интернет трафиги интенсивлигини оширади. Янги йил кечасида навбатчи гуруҳда техник ходимлар билан бир қаторда тармоқ қурилмалари мунтазам мониторингини амалга ошириш учун бириктирилган махсус ходимлар ҳам ишлайди», — деди UMS матбуот котиби Элина Сакаева.
Изоҳ (0)