10 йил аввал Янги Орлеанга шаҳарни ер билан битта қилган, минглаб кишиларни ҳаётдан олиб кетган ва кўплаб оилаларни бошпанасиз қолдирган АҚШ тарихидаги энг вайронкор «Катрина» довули ёпирилди. Мазкур фожиа таниқли актёр Брэд Питтни ларзага солди ва у офат қурбонларига ёрдам бериш учун Make It Right фондига асос солди. Бу ҳақда «AdMe.ru» ҳикоя қилди.
Офатдан энг кўп Лоуэр Нинт Ярд тумани жабр кўрди — ҳудуд деярли тўлиқ сув остида қолди, бинолар эса вайронага айланди. Питт ва фонд томонидан йиғилган маблағга ушбу туманда 109 та уй қурилди.
Актёр таниқли меъморларни таклиф этди ва бинолар режасини тайёрлашда шахсан иштирок этди. Қурилиш бошланганда актёр унинг барча босқичларини ўзи назорат қилди.
Уйлар энг замонавий экотехнологиялар ва «яшил» қурилиш тамойиллари асосида қурилди, томларга қуёш батареялари ўрнатилди.
Жоли ва Питт 2005 йилда ўзлари ҳам Янги Орлеанда ҳашаматли иморат сотиб олди ва уни ўзларининг иккинчи уйларига айлантирди.
Уйлар қойилмақом қурилди: табиий офатларга чидамли, экологик талабларга жавоб берувчи ва кўркам. Актёр бошидан шунча ташвиш ўтган одамлар чиройли ва арзирли бошпанага эга бўлишларини истаганди.
Янги уйларга кўчиб ўтган оилаларнинг қувончи ичига сиғмасди. Лойиҳа устида ишлаш давомида Питт улар билан яхшилаб танишиб олди.
Энди бу туманни таниб бўлмайди. У аллақачон маҳаллий диққатга сазовор жойлардан бирига айланган, бу ердан сайёҳларнинг қадами узилмайди.
Актёр оилалар девор рангларини ўзлари танлашини истаганди. Уларнинг барчаси ҳудди келишиб олгандек янги ҳаёт тимсоли сифатида оқ, сариқ, яшил, мовий каби ҳаётбахш рангларни маъқул кўрди.
Изоҳ (0)