АҚШда ўзининг 9 ёшли ўғлини очликдан ўлдирган ота-она 40 йил қамоқ жазосига ҳукм қилинди

АҚШнинг Пенсильвания штатидаги Харрисбург шаҳар суди ўзининг ўғлини оч қолдириб ўлдирган америкалик оилавий жуфтликни узоқ муддатли қамоқ жазосига ҳукм қилди. Бу ҳақда «ТАСС» хабар қилмоқда.

Маълум қилинишича, 39 ёшли Жарред Татко 42 йил қамоқ жазосига ҳукм қилинди, унинг турмуш ўртоғи 40 ёшли Кимберлига эса 40 йиллик қамоқ жазоси берилди. Шу билан бирга, маҳкумларнинг иккаласи ҳам камида 20 йилдан кейин муддатидан олдин озодликка чиқишга умид қилиши мумкин.

2014 йил август ойида қўшниларнинг хабарига асосан Татко хонадонига етиб келган полиция вафот этган фарзанднинг жасадини, шунингдек, ўлим ёқасида турган унинг 10 ёшли опасини топган. Таъкидланишича, ота-она қизчани ҳам очлик билан қийнаб келган ва уни қутқаришнинг имкони бўлди.