Алишер Усмоновнинг холдингига «CTC Media»нинг активларини сотиб олишга рухсат берилди

Россия ҳукуматининг Хорижий инвестициялар бўйича комиссияси Алишер Усмонов ва Иван Тавриннинг «ЮТВ-холдинг»и таркибига кирувчи «ЮТВ-менежмент»нинг «CТC инвестментс»ни сотиб олиш бўйича илтимосномасини маъқуллади. Бу ҳақда «Ведомости» хабар бермоқда.

«CТC инвестментс»да «CTC Media» холдингининг операцион бизнеси ажратилган. «ЮТВ-менежмент» ушбу компаниянинг 75 фоиз улушини унинг хорижий акциядорлари — Швециянинг MTG (37,9 фоиз акцияларга эгалик қилади) компанияси ва NASDAQ биржасида сотилаётган акциялар (36 фоиз) эгаларидан сотиб олади.

Қолган 25 фоиз улуш «Россия» банки эгаларидан бири Юрий Ковалчук ва унинг ҳамкорларига тегишли Кипрнинг Телcрест Инвестменц Лтд. компания ҳисобида қолади. 2014 йил кузида Россия парламенти қонунчиликка ўзгартириш киритиб, чет элликлар ОАВнинг 20 фоиздан ортиғига эгалик қилишини тақиқлаганди. «CTC Media» акциядорлари вазиятдан чиқишнинг бизнесни сотишдан бошқа йўлини топа олмади. «ЮТВ-холдинг»дан тушган таклиф биринчи ва ягона бўлди.

Аввалроқ «CTC Media» «ЮТВ-холдинг»дан тушган таклиф шартларини маълум қилганди — ТВ-холдингнинг 75 фоиз бизнесини сотиб олиш учун харидор 200 миллион доллар нақд пул таклиф қилган. Бу пулнинг 150,5 миллиони дарҳол тўланади, қолган 50 миллиони эса 2016 йил 1 февралга қадар сақлаб турилади. Агар «CTC Media»нинг операцион ва инвестициявий фаолиятидан келаётган пул оқимлари томонлар келишувидагидан камроқ бўлса, харидор кейинги тўлов миқдорини камайтириши мумкин.