Нарпай туман тиббиёт бирлашмасига қарашли туғуруқ бўлимида доя бўлиб ишловчи аёл воз кечилган чақалоқни 1,5 миллион сўмга сотмоқчи бўлди. Бу ҳақда «Ҳуқуқ» газетаси хабар бермоқда.
Маълум бўлишича, тез орада турмушга чиқиши керак бўлган ёш аёл ҳомиласини тушириш мақсадида туғуруқ бўлимига ёрдам сўраб келган ва доя аёлга учраган. Доя ёрдам сўраётганнинг ҳомиладорлиги сири очилмаслиги учун, уни бирорта холироқ уйга жойлаштириб, ўша ерда туғдиртиришга қарор қилган.
Доя ҳали туғилмаган фарзандидан воз кечишга тайёр аёлни туғуруқхонада фаррош бўлиб ишловчи шахснинг уйига олиб бориб жойлаштиради, эртасига фарзандидан воз кечиш ниятида бўлган аёл қизча туғади. Доя ва фаррош хизмат ҳақига 600 минг сўм олади, туққан аёл Навоийга қайтиб кетади.
Шундан сўнг фаррош янги туғилган чақалоқни бола қидириб юрган танишларидан бирига сотишни таклиф қилади, доя аёл бу фикрни маъқуллаб, чақалоқнинг нархини 1,5 миллион сўм этиб белгилайди. Фаррош аёл харидорга чақалоқ борлигини айтгунича, чақалоқ ўлиб қолади, бироқ харидор барибир болани кўрсатишни талаб қилади.
«Ноилож қолган фаррош аёл харидорни уйига эргаштириб келади. Бу пайтда уларнинг ортидан ҳуқуқни муҳофаза қилувчи орган ходимлари ҳам кириб келади. Доя ва фаррош айбини бўйнига олиб, қилмишларини айтиб беришга мажбур бўлди», — деб ёзади газета.
«Ҳуқуқ» газетасининг қайд этишича, «мазкур ишни кўриб чиққан суд, айбдорларнинг ҳар бирига тегишли жазо тайинлади».
Изоҳ (0)