Россия ҳукумати Туркияда ишлаб чиқарилган (етиштирилган) ва 2016 йил 1 январдан бошлаб Россияга олиб келиниши тақиқланган маҳсулотлар рўйхатини тасдиқлади. «РБК» хабарига кўра, бевосита Туркиядан қайтаётган россияликлар томонидан олиб келинаётган ва шахсий фойдаланиш нормаларидан ошмаган миқдордаги маҳсулотлар тақиққа тушмайди.
Ҳукумат қарорига мувофиқ, Туркияда етиштирилган помидор ва бодринг, пиёз, гулкарам ва брокколи каби сабзавотлар тақиққа тушган.
Меваларнинг қора рўйхатидан янги ва қуритилган цитруслар (апелсинлар, мандаринлар ва уларнинг гибридлари), янги олмалар, ноклар, ўриклар, шафтолилар, нектаринлар, олхўрилар ва тёрн, шунингдек, узум, ертут ва қулупнай ўрин олган.
Чорвачилик маҳсулотларидан музлатилган товуқ ва курка гўштлари ва улардан тайёрланган маҳсулотлар эмбаргога тушган.
Бундан ташқари, 2016 йил 1 январдан эътиборан Туркиядан Россияга туз, шунингдек, гулдаста тайёрлаш ёки бошқа безаклаш ишлари учун яроқли янги чиннигул олиб кириш ҳам тақиқланади.
Экспертларнинг хавотирларга қарши олароқ, бир қатор мева ва сабзавотлар (масалан, лимонлар), йирик қорамол гўшти, сут маҳсулотлари ва балиқ тақиққа тушмади.
Россия президенти Владимир Путин 28 ноябрь куни Туркияга нисбатан санкциялар жорий этиш ҳақидаги фармонни имзолаган эди.
Сурия чегараси яқинида Россиянинг Су-24 бомбардимончи самолёти уриб туширилганидан сўнг, Туркияга нисбатан чекловчи чоралар кўрилди.
Изоҳ (0)