Интернетда Франция президенти Франсуа Олландга Парижда юз берган террорчилик ҳаракатлари ҳақида ахборот берилаётган вазият акс этган фотосуратлар пайдо бўлди. Бу ҳақда «РБК» хабар берди.
Бу вақтда Франция президенти Парижнинг шимолий чеккасидаги Сен-Дени туманида жойлашган «Стад де Франс» стадионида футбол бўйича Франция ва Германия терма жамоалари ўртасидаги учрашувни томоша қилаётган эди — мазкур стадион яқинида ҳам портлашлар юз берган.
Олландга Париждаги терактлар кетма-кетлиги ҳақида ахборот берилаётгани ҳақидаги фотосуратларни Британиянинг The Daily Mail нашри чоп этди. Бу вақтда стадионда, Олланддан ташқари, Франция ташқи ишлар вазири Лоран Фабиус ҳамда унинг германиялик ҳамкасби Франк-Вальтер Штайнмайер ҳам бор эди.
Стадион яқинида амалга оширилган портлашлардан бири шу қадар кучли эдики, унинг овози стадионда ҳам эшитилди — маҳаллий вақт билан тахминан 21:17 да юз берган ушбу ҳолат телетрансляцияларга муҳрланиб қолган.
Аввалроқ Франция президенти ва бошқа юқори мартабали амалдорлар зудлик билан хавфсиз жойга кўчирилгани ҳақида хабар берилган эди. Бироқ, бошқа бир фотосуратда Олланд стадионнинг хавфсизлик хизмати хонасида телефонда суҳбатлашаётгани, бу вақтда соат 21:36 эканлиги акс этган.
- Воқеа: Париждаги терактлар
Изоҳ (0)