2015 йилнинг 10—12 ноябрь кунлари Ўзбекистон Республикаси делегацияси Ченду шаҳрида (Хитой) бўлиб ўтган Шанхай ҳамкорлик ташкилотига аъзо давлатларнинг Йиғилишида иштирок этди, дея хабар бермоқда Ташқи ишлар вазирлиги расмий сайти.
Йиғилишда 2005 йилда имзоланган ШҲТга аъзо давлатлар ҳукуматлари ўртасида фавқулодда вазиятларни бартараф этишда ёрдам кўрсатиш бўйича ҳамкорлик тўғрисидаги битим низомларини амалга ошириш доирасида Қирғизистон, Қозоғистон, Россия, Тожикистон, Хитой ва Ўзбекистоннинг тегишли вазирлик ва идоралари раҳбарлари табиий ва техноген тусдаги фавқулодда вазиятларда чора кўриш масалаларини муҳокама қилди.
Йиғилишдаги чиқишда Ўзбекистон делегацияси раҳбари томонидан Ўзбекистон ҳам бошқа давлатлар билан бир қаторда турли фавқулодда ҳолатларнинг вужудга келиши хавфига дуч келаётганлиги таъкидланди. Жорий йилнинг апрель ойида республика ҳудудида 480—500 минг метр куб миқдоридаги ер кўчиши рўйхатга олинди.
Шунингдек, мамлакат ҳудудида бир қанча сел оқимлари бўлиб ўтганлиги, буларнинг баъзилари эса моддий зарарга олиб келганлиги қайд қилинди.
Ўзбекистонда экологик тусга эга бўлган фавқулодда ҳолатлар ҳақида сўз кетганда, энг аввало Орол денгизининг қуриб бориши ва бунинг оқибатида юзага келаётган муаммоларни алоҳида таъкидлаш лозим. Бир авлод ҳаёти давомида бутунлай йўқолиш ёқасига келиб қолган Орол фожиаси бугун ҳам халқаро ҳамжамият эътибори марказида қолмоқда. Бугунги кунга келиб сув сатҳи Мўйноқ портидан 150 километрга чекинди.
Таъкидлаб ўтилганидек, «вужудга келган кенг кўламли ноҳуш экологик вазият нафақат Ўзбекистон ва Марказий Осиё давлатларига, балки бутун жаҳонга салбий таъсир кўрсатмоқда».
Ўзбекистон Республикаси учун Қирғизистон ва Тожикистон Республикалари билан аҳолига ва иқтисодиёт объектларига хавф манбаи бўлган трансчегаравий ҳудудларда тоғли ва тоғолди пунктларни аэровизуал текширувлардан ўтказиш бўйича тегишли келишувларга эришиш муҳим ҳисобланади.
Зараркунанда чигирткаларга қарши кураш бўйича биргаликда йиллик тадбирларни ўтказиб бориш масаласи ҳам долзарблигича қолмоқда. Ушбу тадбирларнинг самарадорлиги эса қўшни республикаларнинг тегишли идоралари ўртасида тадбирларнинг мақсади, ўтказиш жойи ва вақтини мувофиқлаштиришда ўзаро келишувга эришишга бевосита боғлиқ ҳисобланади.
Ўзбекистон томонининг фикрича, ШҲТ ҳудудида фавқулодда ҳолатларни олдини олиш ва бартараф этиш бўйича мамлакатлар ўртасидаги ҳамкорликни кенгайтиришда юқорида кўрсатилган йўналишлар бўйича ҳамкорлик қилиш барқарорлик ва хавфсизликни таъминлаш, қулай шерикчилик шароитларини яратиш учун самарали омил ҳисобланади.
Изоҳ (0)