АҚШнинг Google корпорацияси шўъба компанияси — Google Life Sciences юрак-қон-томир касалликларига қарши курашнинг замонавий ва инновацион услубларини ўрганишдан иборат илмий-тадқиқот лойиҳасида иштирок этади. Бу ҳақда 8 ноябрь, якшанба куни Флорида штатининг Орландо шаҳрида бўлиб ўтган Америка кардиологлари ассоциацияси (АКА) конференциясида эълон қилинди, дея хабар беради «ТАСС».
Маълумотларга кўра, лойиҳанинг умумий қиймати 50 миллион долларга баҳоланмоқда. Бунинг ярмини АКА, қолган ярмини эса Google молиялаштиради. Ассоциация учун бу илмий-тадқиқот лойиҳасига сарфланган энг катта маблағ бўлади.
«Юрак-қон-томир касалликларидан Ер юзида бошқа ҳар қандай хасталикларга қараганда кўпроқ одамлар нобуд бўлади, — дея таъкидлаган Google Life Sciences раҳбари Энди Конрад. — Бу муаммони инновациялар ёрдамида ҳал этиш вақти келди. Шу пайтгача юрак касалликларига қарши кураш услубларини такомиллаштириш жуда секинлик билан амалга ошган».
Эслатиб ўтамиз, Google Life Sciences шу йил августида корпорациянинг биотиббиёт бўлинмаси асосида ташкил этилган. Компания тиббий-технологик тадқиқотлар ва турли касалликлар олдини олишга қаратилган лойиҳалар устида ишлайди.
Изоҳ (0)